គណៈបញ្ជាការឯកភាពរាជធានីប្រជុំបន្ទាន់ ពង្រឹងកិច្ចការពារសន្តិសុខសុវត្ថិភាពជូនពលរដ្ឋ

ឯកឧត្តម ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញបានណែនាំឲ្យអាជ្ញាធរ និងកងកម្លាំងប្រដាប់អាវុធទាំងអស់អនុវត្តការងារព្រមៗគ្នានិងម៉ឺងម៉ាត់បំផុត ក្នុងកិច្ចការពារសន្តិសុខ សុវត្ថិភាពជូនប្រជាពលរដ្ឋ និងរាជរដ្ឋាភិបាលស្របច្បាប់ ខណៈក្រុមអគតិជ្រុលនិយម គ្រោងនឹងរៀបចំធ្វើបាតុកម្ម ដើម្បីផ្តួលរំលំរាជរដ្ឋាភិបាលស្របច្បាប់ នាថ្ងៃទី១៨ ខែសីហាខាងមុខនេះ។

ការណែនាំនេះបានធ្វើឡើងក្នុងកិច្ចប្រជុំបន្ទាន់មួយជាមួយអាជ្ញាធរខណ្ឌទាំង១៤ និងកម្លាំងកម្លាំងប្រដាប់អាវុធទាំង២ប្រភេទ នាព្រឹកថ្ងៃទី១៧ ខែសីហា ឆ្នាំ២០២៤ នៅសាលារាជធានីភ្នំពេញ។

ឯកឧត្ដមអភិបាលរាជធានីបានបញ្ជាក់ច្បាស់ថា កិច្ចការពារសន្តិសុខសុវត្ថិភាព​ជូន​ប្រជាពលរដ្ឋ​នៅរាជធានីភ្នំពេញ​ជាង ៣លាននាក់ ប្រៀបបានទៅនឹង​កិច្ចការពារសន្តិសុខសុវត្ថិភាព​ជូន​ប្រជាពលរដ្ឋ១៧លាននាក់​នៅទូទាំងប្រទេសដែរ ពី ព្រោះរាជធានីភ្នំពេញ​ជា​បេះដូងនៃព្រះរាជាណាចក្រកម្ពុជា។

ឯកឧត្តម ឃួង ស្រេង បានលើកឡើងថា ការបើកកិច្ចប្រជុំបន្ទាន់នេះ គឺដើម្បីរំលឹកឲ្យអាជ្ញាធរ និង​កងកម្លាំងប្រដាប់អាវុធទាំងអស់កុំមើលស្រាលសភាពការណ៍ ព្រោះថា ​ក្រុមអគតិជ្រុលនិយម ដែលគ្រោង​នឹងរៀបចំធ្វើបាតុកម្ម ដើម្បីផ្តួលរំលំរាជរដ្ឋាភិបាលស្របច្បាប់នាថ្ងៃទី១៨សីហានេះ ពួកគេមិនមែនធ្វើបាតុកម្មដោយការបញ្ចេញមតិនោះទេ ​គឺមានគម្រោងប្រើអំពើហឹង្សាតែម្តង។ ដូច្នេះកម្លាំងទាំងអស់ត្រូវតែម៉ត់ចត់បំផុត ពិសេសចំពោះគោលដៅចូលរាជធានីភ្នំពេញ បើមានការសង្ស័យត្រូវឃាត់ខ្លួនសួរនាំ និងធ្វើកំណត់ហេតុឲ្យបានច្បាស់លាស់។ផ្ទុយទៅវិញបើពិនិត្យឃើញថា ពួកគាត់មានចេតនាចូលមករាជធានីភ្នំពេញដើម្បីធ្វើការ ឬប្រកបរបរជាធម្មតានោះ សូមសម្រួលជូនពលរដ្ឋភ្លាម៕អត្ថបទ ៖ ប្រាក់ វ៉ាន់ដា