កម្ពុជា ជាម្ចាស់ផ្ទះរៀបចំសន្និសីទស្តីពី «កិច្ចការពារអ្នកប្រើប្រាស់អាស៊ានលើកទី៤»

ភ្នំពេញ៖ ប្រទេសកម្ពុជា នៅព្រឹកថ្ងៃទី២៦ ខែសីហា ឆ្នាំ២០២៤នេះ បានរៀបចំសន្និសីទស្ដីពី “កិច្ច​ការពារអ្នកប្រើប្រាស់អាស៊ានលើកទី៤” ដែលប្រព្រឹត្តទៅក្រោមអធិបតីភាព លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម និងជាប្រធានគណៈកម្មាធិការជាតិការពារអ្នកប្រើប្រាស់ «គ.ជ.ក.ប.» ។

សន្និសីទនេះ មានការអញ្ជើញចូលរួមពីតំណាងលេខាធិការដ្ឋានអាស៊ាន ឯកឧត្តម Stefan Messerer ឯកអគ្គរដ្ឋទូតសហព័ន្ធអាល្លឺម៉ង់ប្រចាំនៅកម្ពុជា តំណាង​ឯកឧត្តម​ឯក​អគ្គ​រាជ​ទូត​ចក្រ​ភព​អង់គ្លេសប្រចាំនៅកម្ពុជា តំណាងប្រទេសសមាជិកអាស៊ានទាំង១០ ក្នុងវិស័យ​កិច្ច​ការពារ​អ្នក​ប្រើប្រាស់ និងថ្នាក់ដឹកនាំមកពីក្រសួង ស្ថាប័ននៃរាជរដ្ឋាភិបាល និងវិស័យឯកជន សរុប​ប្រមាណ​ជិត ២០០នាក់។ សន្និសីទនេះ មានគោលគំនិត​សំខាន់​ស្វែង​រក​វិធី​សាស្រ្ត​ដើម្បី​ឱ្យ​ក្រប​ខណ្ឌ​កិច្ច​ការពារ​អ្នក​ប្រើប្រាស់អាចជំរុញនូវរបកគំហើញថ្មី ខណៈពេលដែលផល​ប្រយោជន៍​អ្នក​ប្រើប្រាស់​ត្រូវ​បាន​ការពារ នៅក្នុងសេដ្ឋកិច្ចឌីជីថល និងសេដ្ឋកិច្ចបៃតងដែលកំពុងវិវត្ត។

លោកជំទាវ ចម និម្មល ក្នុងពិធីបើកកម្មវិធី បានមានប្រសាសន៍ថា សន្និសីទលើកទី៤នេះ គឺជា​ព្រឹត្តិការណ៍​មួយដ៏សំខាន់ ក្នុងការបំផុសឡើងនូវគំនិតច្នៃប្រឌិតថ្មី ការរក្សានិរន្តរភាព និងការ​ផ្ដល់​សិទ្ធិ​អំណាច​ដល់អ្នកប្រើប្រាស់ស្របពេលដែលមានការវិវត្តន៍នៃយុគសម័យឌីជីថល និង​សេដ្ឋកិច្ច​បៃតង។ លោកជំទាវ បានបន្តថា ការវិវត្តនៃពិភពលោកឆ្ពោះទៅរកយុគសម័យឌីជីថល បាន​ជះ​ឥទ្ធិពល និង​ផ្លាស់ប្ដូររបៀបនៃការរស់នៅ ជាពិសេសក្នុងការទិញទំនិញការប្រាស្រ័យទាក់ទង និង​ការផ្ទេរប្រាក់ជាដើម។

លោកជំទាវរដ្ឋមន្រ្តី បានជំរាបជូនអង្គប្រជុំទៀតថា ក្នុងនាមជាអ្នកប្រើប្រាស់ ត្រូវបន្សាំ និង​សម្រប​ខ្លួន​ទៅ​តាម​បរិបទថ្មី។ ទន្ទឹមនេះ រាជរដ្ឋាភិបាលកម្ពុជាបានខិតខំ និងបន្តការប្រឹងប្រែង​ក្នុង​ការ​អនុវត្ត​យុទ្ធសាស្រ្តបញ្ចកោណដំណាក់កាលទី១ ជាពិសេសការវិវត្តនៃបច្ចេកវិទ្យាឌីជីថល សម្រាប់​ប្រព័ន្ធសេដ្ឋកិច្ច និងសង្គមទាំងមូលដើម្បីឆ្លើយតបទៅនឹងបដិវត្តន៍ឧស្សាហកម្មទី៤ និង​ការ​ផ្លាស់ប្តូរ​បរិបទនៃការរស់នៅនាសម័យកាលឌីជីថលនេះ។

លោកជំទាវរដ្ឋមន្រ្តី បានលើកឡើងថា ក្នុងនាមជាម្ចាស់ផ្ទះនៃសន្និសីទនេះ កម្ពុជាសូម​ស្វាគមន៍​នូវ​ការ​ចូលរួមចែករំលែក ផ្លាស់ប្ដូរគោលគំនិត ចំណេះដឹង បទពិសោធន៍ និង​ជំនាញ​ទៅ​វិ​ញ​ទៅ​មក​ជូន​ដល់​អ្នកចូលរួមនិងអ្នកពាក់ព័ន្ធទាំងអស់ ដើម្បីឱ្យមានការអភិវឌ្ឍប្រកប ដោយវឌ្ឍនភាពរួមគ្នា បង្កើត​នូវគំនិតថ្មីៗ និងកែលម្អសម្រាប់​ជំរុញកិច្ច​ការពារ​អ្នក​ប្រើប្រាស់​នៅ​ក្នុង​តំបន់​ឱ្យ​កាន់​តែ​ល្អ​ប្រសើរ​ឡើង​ថែមទៀត។

សូមជម្រាបជូនថា សន្និសីទខាងលើនេះ បានធ្វើការប្រមូលផ្តុំនូវភាគីពាក់ព័ន្ធ រួមមាន និយ័តករ និង​ធុរជន ដើម្បីពិភាក្សាអំពីវិធីសាស្រ្តដែលធ្វើឱ្យបទប្បញ្ញត្តិពាក់ព័ន្ធមានលក្ខណៈសមស្រប ក្នុង​ការ​ជំរុញនូវវឌ្ឍនភាពផ្នែកបច្ចេកវិទ្យា និងបរិស្ថាន ដោយមិនធ្វើឱ្យប៉ះពាល់​ដល់​សុវត្ថិភាព​របស់​អ្នក​ប្រើប្រាស់។ កិច្ចពិភាក្សាផ្តោតសំខាន់ទៅលើការអភិវឌ្ឍហេដ្ឋារចនាសម្ព័ន្ធ ដែលផ្ដល់សិទ្ធិ​អំណាច​ដល់​អ្នកប្រើប្រាស់នៅក្នុងសេដ្ឋកិច្ចឌីជីថល ប្រកបដោយទំនុកចិត្ត និងសុវត្ថិភាព៕