សហភាពសហព័ន្ធយុវជនកម្ពុជា ខេត្តព្រៃវែង នឹងរៀបចំកម្មវិធីរត់ក្រោមប្រធានបទ «តោះយើងនាំគ្នាទៅបោះឆ្នោត»

សហភាពសហព័ន្ធយុវជនកម្ពុជា ខេត្តព្រៃវែង នឹងរៀបចំកម្មវិធីរត់ក្រោមប្រធានបទ «តោះយើងនាំគ្នាទៅបោះឆ្នោត» ដើម្បីជាសារមួយរំលឹកដល់ប្រជាពលរដ្ឋទាំងអស់ អញ្ជើញទៅបោះឆ្នោតជ្រើសតាំង តំណាងរាស្រ្ដ។

សេចក្ដីជូនដំណឹងរបស់សហភាពសហព័ន្ធយុវជនកម្ពុជា ខេត្តព្រៃវែង បានឲ្យដឹងថា កម្មវិធីរត់ក្រោមប្រធានបទ «តោះយើងនាំគ្នាទៅបោះឆ្នោត» នេះ នឹងត្រូវធ្វើឡើងនៅថ្ងៃព្រហស្បត្តិ៍ ទី ២០​ ខែកក្កដា ឆ្នាំ ២០២៣ វេលាម៉ោង ៦ និង០០ នាទីព្រឹក នៅបរិវេណសួនច្បារ សម្ដេចអគ្គមហាធម្មពោធិសាល ជា ស៊ីម (ស្ថិតនៅក្នុងក្រុងព្រៃវែង ខេត្តព្រៃវែង)។
សេចក្ដីជូនដំណឹង បានឲ្យដឹងបន្តថា ការទទួលពាក្យចុះឈ្មោះចូលរួមកម្មវិធីនេះ គឺចាប់ពីថ្ងៃជូនដំណឹងរហូតដល់ថ្ងៃទី ១៨ ខែកក្កដា ឆ្នាំ ២០២៣
នៅទីស្នាក់ការសហភាពសហព័ន្ធយុវជនកម្ពុជា​ ខេត្តព្រៃវែង ស្ថិតក្នុងក្រុងព្រៃវែង ខេត្តព្រៃវែង។

លោក ខៀវ ភារិទ្ធ ប្រធានសហភាពសហព័ន្ធយុវជនកម្ពុជា ខេត្តព្រៃវែង បានបញ្ជាក់បន្ថែមថា ការរៀបចំកម្មវិធីរត់ម៉ារ៉ាតង់នេះ​ ក្នុងគោលបំណង​ផ្តល់ជាសារមួយដើម្បីរំលឹកជូន​ប្រជាពលរដ្ឋ​ទាំងអស់ ឲ្យ​អញ្ជើញ​ទៅ​ចូលរួម​បោះឆ្នោត​ជ្រើស​តាំង ​តំណាង​រាស្ត្រ ​នីតិកាល​ទី​ ៧​ ដែលនឹង​ប្រព្រឹត្ត​ទៅ​នៅ​ថ្ងៃទី ​២៣​ ខែកក្កដា​ ឆ្នាំ ២០២៣​ខាងមុខនេះ។

ដោយសារ​តែ​កម្មវិធី​នេះ​ កំពុង​ស្ថិតនៅ​ក្នុង​ដំណាក់កាល​ចុះឈ្មោះ ​អ្នក​ចូលរួម​រត់​ប្រណាំង​ដោយស្មគ្រ័ចិត្ត​នៅឡើយ​។ ដូច្នេះ ក្រុម​ការងារ​រៀបចំ​កម្មវិធី​នេះ ​មិនទាន់អាចបញ្ជាក់​ពីចំនួន​អ្នក​ចូលរួមបាន​នៅឡើយទេ​។ តែយ៉ាងណាក៏ដោយ​ ក្រុមការងារ​រៀបចំ​សង្ឃឹម​ថា​ នឹង​មាន​មន្ត្រីរាជការ​ យុវជន​ យុវនារី​ អាជីវករ​ និង​ប្រជាពលរដ្ឋ នឹង​ចូលរួម​ច្រើន​ក្នុង​កម្មវិធីនេះ៕

អត្ថបទពី៖ KPT