ព័ត៌មាន

ក្រសួងបរិស្ថានផ្ដល់កូនឈើចម្រុះ ៣ពាន់ដើមដល់ «ភូមិរង់ចាំ» ខេត្តបន្ទាយមានជ័យ ជំរុញយុទ្ធនាការគម្របបៃតង និងការអភិវឌ្ឍសហគមន៍តាមព្រំដែន

បន្ទាយមានជ័យ៖ នៅព្រឹកថ្ងៃទី៩ ខែវិច្ឆិកា ឆ្នាំ២០២៦នេះ ក្រុមការងារក្រសួងបរិស្ថានបានដឹកកូនឈើ៣ពាន់ដើមដល់ទីតាំង ដើម្បីប្រគល់និងដាំនៅភូមិរង់ចាំ នៃភូមិសាស្រ្តរបស់ ខេត្តបន្ទាយមានជ័យ។ ពិធីដាំឈើនឹងប្រព្រឹត្តទៅរួមគ្នានាថ្ងៃនេះតែម្ដង។

សូមជម្រាបថា ក្រសួងបរិស្ថាន បានសម្រេចផ្តល់កូនឈើចម្រុះសរុបចំនួន ៣,០០០ ដើម ជូនដល់រដ្ឋបាលខេត្តបន្ទាយមានជ័យ និងភាគីពាក់ព័ន្ធ ដើម្បីយកទៅដាំដុះនៅ «ភូមិរង់ចាំ» ដែលជាតំបន់យុទ្ធសាស្ត្រតាមបណ្តោយព្រំដែន សម្រាប់ជួយសម្រួលដល់ការរស់នៅរបស់ប្រជាពលរដ្ឋភៀសសឹក។

សកម្មភាពនេះធ្វើឡើងក្រោមការដឹកនាំផ្ទាល់របស់ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងការគាំទ្រដល់មូលដ្ឋាន និងដៃគូសហការ ទាំងនៅថ្នាក់ជាតិ និងថ្នាក់ក្រោមជាតិ វិស័យឯកជន ក្រុមហ៊ុន សែនគីរីអេកូផាក ដើម្បីជំរុញយុទ្ធនាការគម្របបៃតង និងការអភិវឌ្ឍសហគមន៍តាមព្រំដែនប្រកបដោយនិរន្តរភាព៕