TikTok ព្រមានពីផលវិបាកយ៉ាងទូលំទូលាយ ប្រសិនបើតុលាការកំពូលអាមេរិក អនុម័តបម្រាម

មេធាវីតំណាងកម្មវិធីវីដេអូខ្លី TikTok ក្រុមហ៊ុនមេរបស់ខ្លួនមានមូលដ្ឋាននៅចិន គឺ ByteDance បានចេញការព្រមាន មួយ អំឡុងពេលតុលាការកំពូលជំនុំជម្រះលើច្បាប់ដែលនឹងបង្ខំឱ្យលក់កម្មវិធីវីដេអូខ្លីមួយនេះ ឬប្រឈមការហាមឃាត់នៅក្នុងសហរដ្ឋអាមេរិក ដោយសង្កត់ធ្ងន់ពីផលវិបាកទូលំទូលាយថា “ប្រសិនបើសភាអាចធ្វើបែបនេះចំពោះ TikTok រឿងនេះក៏អាចកើតឡើងលើក្រុមហ៊ុនផ្សេងទៀតដែរ”។

ច្បាប់ ដែលជាកម្មវត្ថុនៃទឡ្ហីករណ៍នៅចំពោះមុខចៅក្រមទាំង ៩រូបកាលពីថ្ងៃសុក្រ (១០ មករា) នោះ បានដាក់កាលបរិច្ឆេទផុតកំណត់នៅថ្ងៃទី១៩ ខែមករា សម្រាប់ឱ្យ ByteDance លក់វេទិកាប្រព័ន្ធផ្សព្វផ្សាយសង្គមដ៏ពេញនិយមមួយនេះ បើមិនដូច្នេះទេនឹងប្រឈមការហាមឃាត់លើមូលដ្ឋានសន្តិសុខជាតិ។

ក្រុមហ៊ុនបានស្វះស្វែងពន្យារពេលការអនុវត្តច្បាប់នោះ ដែលពួកគេនិយាយថា បំពានលើការការពារវិសោធនកម្មទីមួយ របស់រដ្ឋធម្មនុញ្ញអាមេរិក ប្រឆាំងនឹងការជ្រៀតជ្រែករបស់រដ្ឋាភិបាលលើការបញ្ចេញមតិដោយសេរី។

មេធាវី ណូអែល ហ្វ្រង់ស៊ីស្កូ (Noel Francisco) តំណាងឱ្យ TikTok និង ByteDance បានអះអាងថា ការអនុម័តរបស់តុលាការកំពូលនៃច្បាប់នេះ អាចអនុញ្ញាតឱ្យមានលក្ខន្តិកៈកំណត់គោលដៅលើក្រុមហ៊ុនផ្សេងទៀតនៅលើមូលដ្ឋានស្រដៀងគ្នានេះ។

ចៅក្រមបានផ្តល់សញ្ញាតាមរយៈសំណួររបស់ពួកគេក្នុងអំឡុងពេលនៃទឡ្ហីករណ៍ថា ខ្លួននៅតែចង់រក្សាច្បាប់ហាមប្រាមលើ TikTok ដែលជាវេទិកាសង្គមមួយ ប្រើប្រាស់ដោយមនុស្សប្រហែល ១៧០លាននាក់ នៅក្នុងសហរដ្ឋអាមេរិក ពោលគឺប្រហែលពាក់កណ្តាលនៃចំនួនប្រជាជនសរុបរបស់ប្រទេសនេះ៕