សម្ព័ន្ធមិត្តកូរ៉េខាងត្បូង អាមេរិក និងជប៉ុន ធ្វើសមយុទ្ធយោធារួមគ្នា បន្ទាប់ពីកូរ៉េខាងជើង បាញ់មីស៊ីល

កងកម្លាំងទ័ពអាកាសរបស់កូរ៉េខាងត្បូង សហរដ្ឋអាមេរិក និងជប៉ុន កាលពីពុធ (១៥ មករា) បានធ្វើសមយុទ្ធយោធារួមគ្នា ដែលពាក់ព័ន្ធនឹងយន្តហោះទម្លាក់គ្រាប់បែកយុទ្ធសាស្ត្រល្បឿនលឿនជាងសំឡេង ជាពិសេសប្រភេទ B-1B ដ៏ទំនើប។

ក្រៅពីយន្តហោះទម្លាក់គ្រាប់បែកយុទ្ធសាស្ត្រនោះ យន្តហោះចម្បាំង F-15 របស់កូរ៉េខាងត្បូង និងយន្តហោះចម្បាំង F-2 របស់ជប៉ុន ក៏បានចូលរួមនៅក្នុងសមយុទ្ធផងដែរ។ សមយុទ្ធនេះធ្វើឡើងភ្លាមៗបន្ទាប់ពីកូរ៉េខាងជើង បានធ្វើតេស្តមីស៊ីលលឿនជាងសំឡេង និងរយៈចម្ងាយខ្លីកាលពីថ្ងៃអង្គារ ១៤ មករា។

យោងតាមក្រសួងការពារជាតិប្រទេសទាំងបីបានឱ្យដឹងថា សមយុទ្ធនេះត្រូវបានរៀបចំឡើងដើម្បីបង្កើនសមត្ថភាពរួមរបស់សម្ព័ន្ធមិត្តទាំងបីក្នុងការទប់ស្កាត់ និងឆ្លើយតបទៅនឹងការគំរាមកំហែងនុយក្លេអ៊ែរ និងមីស៊ីលដែលកំពុងកើនឡើងរបស់កូរ៉េខាងជើង។

យន្តហោះទម្លាក់គ្រាប់បែក B-1B ដានមត្ថភាពផ្ទុកទាំង្បាលគ្រាប់ធម្មតា និងនុយក្លេអ៊ែរ ត្រូវបានគេមើលឃើញថាជាការបង្ហាញកម្លាំង និងការប្តេជ្ញាចិត្តចំពោះស្ថិរភាពក្នុងតំបន់។

សមយុទ្ធនេះក៏បានកើតឡើងនៅពេលដែលក្ដីបារម្ភកាន់តែខ្លាំងឡើងអំពីវឌ្ឍនភាពយោធារបស់កូរ៉េខាងជើង រួមទាំងការអភិវឌ្ឍន៍អាវុធល្បឿនលឿនជាងសំឡេង ដែលត្រូវបានចាត់ទុកថាពិបាកស្ទាក់ចាប់ ដោយសារល្បឿន និងភាពបត់បែនរបស់អាវុធទាំងនោះ៕