ទីម័រឡេស្តេនឹងបានចូលសមាជិកអាស៊ានពេញសិទ្ធិនៅខែតុលាខាងមុខ ខណៈប្រជាជន និង​មេដឹកនាំ​ទីម័រ​នឹងចារឈ្មោះរដ្ឋបុរសកម្ពុជាសម្ដេចតេជោជាប្រវត្តិសាស្រ្តបានជ្រោមជ្រែងទីម័រ

ភ្នំពេញ៖ ឯកឧត្តម ជា ធីរិទ្ធ អ្នកនាំពាក្យ ព្រឹទ្ធសភា បានឱ្យដឹងនៅរសៀលថ្ងៃទី២៦ ខែ​ឧសភា​នេះ​ថា ប្រទេសទីម័រឡេស្តេ នឹងបានចូលសមាជិកអាស៊ានពេញសិទ្ធិនៅខែតុលា ខាងមុខ ខណៈ​ប្រជាជន និងមេដឹកនាំទីម័រនឹងចារនូវឈ្មោះរដ្ឋបុរសកម្ពុជា ជាប្រវត្តិសាស្រ្ត ដែល​បាន​ជ្រោម​ជ្រែង​ទីម័រ​។

យោងតាមឯកឧត្តម ចូសេ រ៉ាម៉ូស ហ័រតា (José Ramos-Horta) ប្រធានាធិបតី ទីម័រឡេស្ដេ បាន​បង្ហោះ​នៅលើបណ្ដាញសង្គមហ្វេសប៊ុកនៅថ្ងៃទី២៦ ខែឧសភានេះ ដោយឯកឧត្តម​បាន​ថ្លែង​អំណរ​គុណ​យ៉ាង​ជ្រាលជ្រៅចំពោះមេដឹកនាំ និងមន្ត្រីនៃអាស៊ានទាំងអស់តាំងពីអតីតកាល និង​បច្ចុប្បន្ន​។ ឯកឧត្តមបន្តថា មេដឹកនាំ ទីម័រ តាំងពីអតីតកាល និងបច្ចុប្បន្នបានជឿជាក់លើអាស៊ាន និង​បាន​ធ្វើការយ៉ាងលំបាកក្នុងរយៈពេល ២ ឆ្នាំចុងក្រោយ​នេះ​ហើយ​ពេល​នេះ​គឺ​ទទួល​បាន​លទ្ធផល​គួរ​ឱ្យអ​បអរសាទរ។

តាមរយៈខ្លឹមសារនៅក្នុងសេចក្តីប្រកាសដ៏សំខាន់មួយនៅក្នុងកិច្ចប្រជុំកំពូលអាស៊ានលើកទី ៤៦ ដែល​ប្រារព្ធឡើងនៅទីក្រុងគូឡាឡាំពួ នាយករដ្ឋមន្រ្តីម៉ាឡេស៊ី ឯកឧត្តម ដាតុ ស៊េរី អាន់វ៉ា អ៊ីប្រា​ហ៊ីម (Dato’ Seri Anwar Ibrahim) បានប្រកាសជាផ្លូវការថា ប្រទេស​ទីម័រ​ខាង​កើត​នឹង​ចូល​ជា​ស​មាជិក​ពេញ​សិទ្ធិក្នុងអាស៊ាននៅឯកិច្ចប្រជុំកំពូលអាស៊ានលើកទី ៤៧ ដែលគ្រោងធ្វើនៅក្រុង ក្រុង​គូឡាឡាំពួ នៅខែតុលា ខាងមុខនេះ។

នៅក្នុងសេចក្ដីប្រកាសនោះ នាយករដ្ឋមន្រ្តីម៉ាឡេស៊ី ឯកឧត្តម ដាតុ ស៊េរី អាន់វ៉ា អ៊ីប្រាហ៊ីម បាន​ថ្លែង​អំណរ​គុណយ៉ាងជ្រាលជ្រៅបំផុត ដឹងគុណ និងទទួលស្គាល់ចំពោះគ្រប់ភាគីទាំងក្នុងអាស៊ាន និង​ក្រៅប្រទេស ដែលបានរួមចំណែកដោយមិនចេះនឿយហត់ដល់ព្រឹត្តិការណ៍ដ៏សំខាន់នេះ។ ឯកឧត្តមនាយករដ្ឋមន្រ្តីម៉ាឡេស៊ី បានកោតសរសើរចំពោះការយកចិត្តទុកដាក់ កិច្ចសហ​ប្រតិបត្តិ​ការ​ និងការប្តេជ្ញាចិត្តមិនងាករេចំពោះសាមគ្គីភាព និងការរួមបញ្ចូលក្នុងតំបន់។

នៅ​ក្នុង​សេចក្ដីប្រកាសនោះ នាយករដ្ឋមន្រ្តីម៉ាឡេស៊ី បានបញ្ជាក់ដែរថា នេះគឺជា​ពេល​វេលា​ប្រវត្តិ​សាស្ត្រ​មួយ ​មិនត្រឹមតែសម្រាប់ទីម័រខាងកើតប៉ុណ្ណោះទេ ប៉ុន្តែសម្រាប់គ្រួសារអាស៊ានទាំងមូល៕