ពលរដ្ឋខ្មែរគ្រប់ទិសទីដូររូបភាព Profile តាមបណ្តាញសង្គម​បង្ហាញការគាំទ្រការ​បើកការដ្ឋានសាងសង់​ព្រែកជីកហ្វូណនតេជោ

ណៈការបើកការដ្ឋានសាងសង់នូវគម្រោង«ព្រែកជីកហ្វូណនតេជោ» កាន់​តែ​ខិត​ជិត​មក​ដ​ល់​នោះ ​បងប្អូនប្រជាពលរដ្ឋខ្មែរមកពីគ្រប់ទិសទី បានសម្រេច​ដូររូប​ប្រូហ្វាល (Profile) របស់ខ្លួន​តាម​បណ្តាញស​ង្គមហ្វេសបុក និងតេលេក្រាម(Telegram) បង្ហាញការអបអរសាទរ និងគាំទ្រ យ៉ាង ពេញទំហឹងនូវគម្រោងដ៏ធំរបស់កម្ពុជាមួយនេះ ដែលគម្រោងនេះនឹង ផ្តល់អត្ថ​ប្រយោជន៍​យ៉ាង​ធំធេង​ដល់ប្រជាជន និងប្រទេសកម្ពុជាទាំងមូល។

សូមបញ្ជាក់ថា គម្រោង«ព្រែកជីកហ្វូណនតេជោ»នឹងបើកការដ្ឋានសាងសង់ នៅថ្ងៃទី៥ ខែសីហា ឆ្នាំ២០២៤ខាងមុខនេះក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ខណៈ​គម្រោងយក្សមួយនេះត្រូវបានប្រជាពលរដ្ឋខ្មែរទាំងក្នុង និងក្រៅប្រទេស​បាន​ចូល​រួម​អបអរ​សាទរ និងប្រកាសគាំទ្រយ៉ាងពេញទំហឹង ថែមទាំងត្រៀមខ្លួនវាយជួង ទូងស្គរ និងរគាំង​ក្នុង​ថ្ងៃ​បើក​ការដ្ឋាន​សាងសង់។

គម្រោង«ព្រែកជីកហ្វូណនតេជោ» មានប្រវែង១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រ ខេត្តកែប ដោយឆ្លងកាត់ខេត្តចំនួន៤៖ ខេត្តកណ្តាល ខេត្តតាកែវ ខេត្ត​កំពត និងខេត្តកែប។ការសាងសង់គម្រោងផ្លូវទឹកថ្មីនេះ ត្រូវបានប៉ាន់ស្មានថា នឹង​ចំណាយ​ទុនវិនិយោគ ១,៧០០លានដុល្លារ និងរយៈពេលសាងសង់ប្រមាណ៤ឆ្នាំ។

ចាប់តាំងពីរាជរដ្ឋាភិបាលប្រកាសជាផ្លូវការចំពោះគម្រោងព្រែកជីកហ្វូណនតេជោនេះ ប្រជា​ពលរដ្ឋ​ខ្មែរ​ទាំងក្នុង និងក្រៅប្រទេស និស្សិត បញ្ញវន្ត មន្ត្រីរាជការ កងកម្លាំងប្រដាប់​អាវុធ​គ្រប់​ប្រភេទ ព្រះសង្ឃ ស្ថាប័នជាតិ និងក្រោមជាតិ ព្រមទាំងបណ្តាគណបក្សនយោបាយ និង​អង្គការ​សង្គម​ស៊ីវិលផង បានចេញញ្ញត្តិ និង​សំឡេង​គាំទ្រ​យ៉ាង​កង​រំពង​ដើម្បី​ឱ្យ​រាជ​រដ្ឋាភិបាល​សម្រេច​គម្រោង​ព្រែក​ជីកនេះឱ្យទាល់តែបាន។ ការគាំទ្រគម្រោងព្រែកជីកដ៏មានសារសំខាន់មួយនេះ បាន​ក្លាយ​ជា​ចលនាជាតិយ៉ាងធំទូលំទូលាយ និងបានបង្ហាញឱ្យឃើញ​ពី​មហា​សាមគ្គី​ជាតិ​ផ្ទៃ​ក្នុង​ខ្មែរ​យ៉ាង​រឹងមាំ។

គម្រោងព្រែកជីកហ្វូណនតេជោមានអត្ថប្រយោជន៍ដ៏មហាសាលសម្រាប់កម្ពុជាពោលគឺ វា​អាច​កាត់​បន្ថយរយៈពេលចម្ងាយ និងតម្លៃនៃការដឹក​ជញ្ជូន​ដែល​អំណោយ​ផល​ដល់​ភាព​ប្រកួត​ប្រជែង នៃ​ទំនិញកម្ពុជា ពោលគឺអាចបង្កើតតំបន់ពាណិជ្ជកម្ម មជ្ឈមណ្ឌលភស្តុភារកម្ម និងការអភិវឌ្ឍ​ផែរណប​ថ្មីៗ​ជាច្រើនជាដើម។ ក្រៅពីនោះ ព្រែកជីកនេះក៏អំណោយផលដល់ការអភិវឌ្ឍកសិកម្ម ប្រព័ន្ធ​ធារាសាស្ត្រ វារីវប្បកម្ម និងការចិញ្ចឹមសត្វផងដែរ។

«ព្រែកជីកហ្វូណនតេជោ»នេះក៏នឹងជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា ដោយ​បង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និង​កំពង់​ផែ​ផ្សេងៗទៀត ថែមទាំងជួយជំរុញការអភិវឌ្ឍផ្នែកនគរូបនីយកម្ម ក៏ដូចជាផ្នែកអចលនទ្រព្យ។ នៅ​មាន​ផល​ប្រយោជន៍ជាច្រើនទៀតដែលពលរដ្ឋរស់នៅតាមដងព្រែកទទួលបាន។ ផលប្រយោជន៍​ដ៏​មហិមា​នេះ​ហើយ​ដែល​ជំរុញ​ឱ្យប្រជាពលរដ្ឋខ្មែរគ្រប់ទិសទីផ្តល់ការគាំទ្រដោ​យ​ឥតរា​រែក​ដល់​គម្រោង​ព្រែក​ជីកនេះជាក់ស្តែង ខណៈការបើកការដ្ឋានសាងសង់ជាផ្លូវការនៅ​សល់តែប៉ុន្មាន​ថ្ងៃ​ទៀត​នោះ បងប្អូនប្រជាពលរដ្ឋបាននាំគ្នា ប្តូរប្រូហ្វាល់របស់ខ្លួន​ដោយ​ក្នុងប្រូហ្វាល​នោះ​បាន​លើក​ឡើង​ថា«៥ សីហា ២០២៤ អបអរសាទរពិធីបើក ការដ្ឋានព្រែកជីកហ្វូណនតេជោ CPP​ដើម្បី​ប្រជាជនកម្ពុជា» ៕

អត្ថបទ៖ បាន ចក់