ប្រធានក្រុមការងាររាជរដ្ឋាភិបាលចុះមូលដ្ឋានឃុំគូលែនត្បូង ចុះសួរសុខទុក្ខ និងនាំយកអំណោយចែកជូនចាស់ជរា នាឱកាសបុណ្យភ្ជុំបិណ្ឌ!

ក្នុងបរិយាកាសស្និទ្ធស្នាលប្រកបដោយទឹកចិត្តមនុស្សធម៌ នាឱកាសពិធីបុណ្យកាន់បិណ្ឌ និងភ្ជុំបិណ្ឌ ប្រពៃណីជាតិខ្មែរ លោកស្រី ហែម សុគុណពិសី ប្រធានក្រុមការងាររាជរដ្ឋាភិបាលចុះមូលដ្ឋានឃុំគូលែនត្បូង ស្រុកគូលែន ខេត្តព្រះវិហារ រួមជាមួយ លោកស្រី គាត កិច្ច អនុប្រធានមន្ទីរពេទ្យបង្អែក ១៦មករាខេត្ត និងលោកស៊ុន កុសល មេឃុំគូលែនត្បូង បានដឹកនាំក្រុមការងារចុះសួរសុខទុក្ខ និងនាំយកអំណោយជាគ្រឿងឧបភោគ បរិភោគ ព្រមទាំងថវិកាមួយចំនួន ទៅចែកជូនដល់លោកតា លោកយាយចាស់ជរា ក្នុងមូលដ្ឋានឃុំគូលែនត្បូង។

ក្នុងឱកាសនោះ លោកស្រី ហែម សុគុណពិសី បានពាំនាំនូវប្រសាសន៍ផ្តាំផ្ញើរសួរសុខទុក្ខពីសំណាក់ថ្នាក់ដឹកនាំ រាជរដ្ឋាភិបាល អជ្ញាធរគ្រប់លំដាប់ថ្នាក់ និងបានសម្តែងនូវភាពស្និតស្នាលដោយក្តីស្រឡាញ់ យកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋ ជាពិសេសចាស់ជរានៅក្នុងមូលដ្ឋាន។

ទន្ទឹមនឹងនេះ លោកស្រី គាត កិច្ច អនុប្រធានមន្ទីរពេទ្យបង្អែក១៦មករាខេត្ត ក៏បានផ្តាំផ្ញើឱ្យលោកយាយ លោកតា ឱ្យយកចិត្តទុកដាក់លើសុខភាព ដោយអនុវត្តការរស់នៅស្អាត ហូបស្អាត ផឹកស្អាត ព្រមទាំងថែរក្សាសុខភាពឱ្យបានល្អប្រសើរ ។

គួរជម្រាបថា អំណោយដែលបានចែកជូននាពេលនេះ រួមមានគ្រឿងឧបភោគ បរិភោគចាំបាច់ប្រចាំថ្ងៃ និងថវិកាមួយចំនួន ដែលជាការចូលរួមចំណែកក្នុងការជួយសម្រាលទុក្ខលំបាក និងនាំមកនូវភាពកក់ក្ដៅជូនដល់លោកយាយ លោកតា ក្នុងឱកាសបុណ្យភ្ជុំបិណ្ឌនេះ។

លោកយាយ លោកតា ដែលទទួលបានអំណោយ បានសម្តែងនូវក្តីរំភើបរីករាយ និងបានថ្លែងអំណរគុណយ៉ាងជ្រាលជ្រៅចំពោះ លោកស្រី ហែម សុគុណពិសី លោកស្រី គាត កិច្ច ព្រមទាំងក្រុមការងារទាំងអស់ ដែលតែងតែគិតគូរ និងមិនបោះបង់ចោលប្រជាពលរដ្ឋឡើយ ព្រមទាំងបានជូនពរឱ្យក្រុមការងារជួបតែសេចក្តីសុខ និងជោគជ័យគ្រប់ភារកិច្ច។