ប្រទេសចិន ជំរុញឱ្យសហរដ្ឋអាមេរិក ដកការដំឡើងពន្ធទាំងអស់លើទំនិញចិនជាបន្ទាន់

ក្រសួងពាណិជ្ជកម្មចិន បាននិយាយកាលពីថ្ងៃព្រហស្បតិ៍សប្ដាហ៍នេះថា សហរដ្ឋអាមេរិកគួរតែដកការដំឡើងពន្ធទាំងអស់លើទំនិញចិនជាបន្ទាន់ មុនពេលការប្រកាសដោយរដ្ឋបាលលោក Biden ស្តីពីការដំឡើងពន្ធដែលរំពឹងទុកលើទំនិញផលិតនៅប្រទេសចិន រួមទាំងរថយន្តអគ្គិសនីផងដែរ។

សហរដ្ឋអាមេរិក ត្រូវបានគេរំពឹងថានឹងសម្រេចចិត្តចុងក្រោយរបស់ខ្លួននៅក្នុងប៉ុន្មានថ្ងៃខាងមុខនេះ បន្ទាប់ពីពន្យារពេលការសម្រេចចិត្តពីរលើក ខណៈខ្លួនបានបន្តពិនិត្យការកែប្រែដែលបានស្នើឡើងចំពោះការដំឡើងពន្ធលើទំនិញរបស់ចិន ដែលបានដាក់ក្រោមរបាលរបស់អតីតប្រធានាធិបតី លោក Donald Trump ក្នុង ២០១៨ និង២០១៩ ។

ដើមឡើយ កាតព្វកិច្ចបង់ពន្ធខ្ពស់១០០% លើរថយន្តអគ្គិសនីឬ EVs ៥០% លើបន្ទះឈីប ពាក់កណ្ដាលចម្លង និងផ្ទាំងថាមពលព្រះអាទិត្យ ឬសូឡា និង២៥% លើអាគុយលីចូម និងសារធាតុរ៉ែសំខាន់ៗ ដូចជា រ៉ែដែក និងអាលុយមីញ៉ូម គ្រឿងស្ទួចទំនិញ និងសឺរ៉ាំងចាក់ថ្នាំ ត្រូវចូលជាធរមានកាលពីថ្ងៃទី១ខែសីហា។

ប៉ុន្តែការិយាល័យតំណាងពាណិជ្ជកម្មអាមេរិកកាលពីថ្ងៃទី៣០ ខែកក្កដា បានពន្យារពេលការអនុវត្តដោយនិយាយថាខ្លួនត្រូវការពេលវេលាបន្ថែមទៀតដើម្បីសិក្សាមតិសាធារណៈជាង១.១០០ ពីឧស្សាហកម្ម។ ការិយាល័យនេះ បានកំណត់កាលបរិច្ឆេទថ្មីកាលពីថ្ងៃទី ៣១ ខែសីហា ដែលត្រូវបានពន្យារពេលបន្ថែមទៀត។

ការពន្យារពេលចុងក្រោយនេះបានកើតឡើងបន្ទាប់ពីទីប្រឹក្សាសន្តិសុខជាតិសេតវិមានលោក Jake Sullivan បានជួបពិភាក្សាជាច្រើនថ្ងៃនៅទីក្រុងប៉េកាំង រួមទាំងកិច្ចប្រជុំជាមួយប្រធានាធិបតីចិន លោក Xi Jinping ដែលភាគីទាំងពីរបានសង្កត់ធ្ងន់លើតម្រូវការគ្រប់គ្រងទំនាក់ទំនងអាមេរិក-ចិន ដើម្បីបញ្ចៀសឲ្យបាននូវការប្រឈមដាក់គ្នាកាន់តែខ្លាំងថែមទៀត៕