ប្រមុខទ័ពអាមេរិក និងចិន នឹងពិភាក្សាគ្នាអំពីការបង្ការជម្លោះនៅប៉ុន្មានសប្តាហ៍ខាងមុខ

ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសចិន បាននិយាយកាលពីថ្ងៃព្រហស្បតិ៍ (០៥ កញ្ញា) ថា មេបញ្ជាការកងកម្លាំងអាមេរិកនៅឥណ្ឌូប៉ាស៊ីហ្វិក នឹងនិយាយទៅកាន់មេបញ្ជាការភាគខាងត្បូងនៃកងកម្លាំងប្រដាប់អាវុធរបស់ប្រទេសចិន ក្នុងប៉ុន្មានសប្តាហ៍ខាងមុខនេះ ដោយមានគោលបំណងទប់ស្កាត់ការយល់ច្រឡំខាងយោធាណាមួយរវាងប្រទេសមហាអំណាចទាំងពីរ។

ការលើកឡើងរបស់លោក នីកូឡាស បឺនស៍ (Nicholas Burns) នេះបានកើតឡើងបន្ទាប់ពីដំណើរទស្សនកិច្ចទៅកាន់ទីក្រុងប៉េកាំង កាលពីខែមុនដោយទីប្រឹក្សាសន្តិសុខជាតិអាមេរិក លោក ជេក ស៊ូលីវ៉ាន់ (Jake Sullivan) ដែលបានជួបជាមួយទីប្រឹក្សាយោធានាំមុខរបស់មេដឹកនាំចិន លោក ស៊ី ជីនពីង (Xi Jinping) ហើយបានយល់ព្រមថាមេដឹកនាំបញ្ជាការនៅឥណ្ឌូប៉ាស៊ីហ្វិករបស់អាមេរិក នឹងនិយាយតាមទូរសព្ទក្នុងពេលឆាប់ៗនេះជាមួយសមភាគីនៅបញ្ជាការខាងត្បូងរបស់ចិន ដែលគ្របដណ្តប់លើតំបន់សមុទ្រភាគខាងត្បូងរបស់ខ្លួន។

លោក Burns បាននិយាយនៅក្នុងបទសម្ភាសន៍ជាមួយទស្សនាវដ្តីនយោបាយការបរទេស (Foreign Policy) ថា «ខ្ញុំគិតថា ឧត្តមនាវីឯក លោក សែម ផាផារ៉ូ (Sam Paparo) នឹងមានការសន្ទនាជាមួយមេបញ្ជាការខាងត្បូងនៃកងទ័ពរំដោះប្រជាជនចិន ក្នុងប៉ុន្មានសប្ដាហ៍ខាងមុខនេះ»។

លោក Burns និយាយថា ទីក្រុងវ៉ាស៊ីនតោន បាននឹងកំពុងស្វះស្វែងរកបណ្តាញទំនាក់ទំនងយោធា និងយោធាកាន់តែជិតស្និតជាមួយទីក្រុងប៉េកាំង ចាប់តាំងពីទំនាក់ទំនងបានធ្លាក់ចុះដល់ចំណុចទាបជាប្រវត្តិសាស្ត្រ បន្ទាប់ពីសហរដ្ឋអាមេរិក បានបាញ់ទម្លាក់បាឡុងឃ្លាំមើលមួយដែលសង្ស័យថាជារបស់ចិនកាលពីឆ្នាំមុនមក៕