ឯកឧត្តម ឌិត ទីណា៖ វិស័យស្រូវអង្ករនឹងអាចរីកចម្រើនទៅមុខបាន ចាំបាច់ទាមទារឲ្យស្ថាប័នរដ្ឋ និងឯកជន សហការគ្នា

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើកឡើងថា ការងារស្រូវ-អង្ករ គឺជាការងារអន្តរស្ថាប័នទាំងរដ្ឋ និងវិស័យឯកជន ដែលទាមទារឲ្យមានការសហការគ្នាល្អ រួមគ្នា​ពិនិត្យលើបញ្ហាប្រឈម ក៏ដូចជារកដំណោះស្រាយជាមួយគ្នា ដើម្បីជំរុញ​វិស័យ​ស្រូវ​អង្ករ​ឲ្យ​កាន់​តែ​រីកចម្រើនទៅមុខបន្ថែមទៀត។

ក្នុងឱកាសដឹកនាំកិច្ចប្រជុំក្រុមការងារផ្នែកស្រូវ-អង្ករ (ក្រុម ឈ) នៃវេទិការាជរដ្ឋាភិបាល-ផ្នែក​ឯកជន កាលពីរសៀលថ្ងៃទី៥ ខែកញ្ញា ឆ្នាំ២០២៤កន្លងទៅ ឯកឧត្តម ឌិត ទីណា បាន​គូស​បញ្ជាក់​ថា ការងារស្រូវ-អង្ករនេះ ទាំងស្ថាប័នរដ្ឋ និងវិស័យឯកជន ពិតជាត្រូវ​រួមគ្នា​ពិនិត្យ​លើ​បញ្ហា​ប្រឈម​នានា វិភាគវាយតម្លៃឱ្យបានច្បាស់លាស់ តាមរយៈការក្តោបព័ត៌មានគ្រប់ជ្រុងជ្រោយ ដើម្បី​ពិភាក្សារកដំណោះស្រាយមានរយៈពេលវែង ទទួលយកបានទាំងអស់គ្នា និង​មាន​ផល​ប្រយោជន៍​រួម​ជាលក្ខណៈសេដ្ឋកិច្ច ទាំងសម្រាប់វិស័យឯកជន និងសេដ្ឋកិច្ចជាតិ។

បើ​តាម​ក្រសួងកសិកម្ម រុក្ខាប្រមាញ់ និងនេសាទ អង្គប្រជុំនេះ មានរបៀបវារៈចំនួន ៣សំខាន់ រួម​មាន ផ្នែកផលិតកម្មនិងការដាំដុះ ផ្នែកផលិតកម្ម-ការកិនកែច្នៃ ផ្នែកពន្ធដារក្នុងវិស័យស្រូវអង្ករ។ សហគមន៍​អ្នកផលិត តំណាងរោងម៉ាស៊ីនកិនស្រូវ ក្រុមហ៊ុននាំចេញអង្ករ និងថ្នាក់​ដឹកនាំ​នៃ​ក្រសួង​កសិកម្ម រុក្ខាប្រមាញ់ និងនេសាទ បានស្ដាប់និងពិភាក្សាយ៉ាងលម្អិតលើរបៀបវារៈទាំង៣ និង​សំណើរបស់ភាគីឯកជន មុននឹងឯកឧត្តមរដ្ឋមន្ដ្រី សហប្រធានក្រុមការងារផ្នែកស្រូវ-អង្ករ (ក្រុម ឈ) ផ្ដល់ជម្រើសដំណោះស្រាយចំពោះសំណើនីមួយៗ។

ចំពោះ​សំណើមួយចំនួនដែលស្ថិតនៅក្រៅដែនសមត្ថកិច្ចរបស់ក្រសួងកសិកម្ម រុក្ខាប្រមាញ់ និង​នេសាទ ឯកឧត្តមរដ្ឋមន្ដ្រី បានផ្ដល់អនុសាសន៍ដល់ភាគីឯកជន លើក​យក​ទៅ​ប្រជុំ​ពិភាក្សា​ជាមួយ​ក្រុមការងារទទួលបន្ទុក ដើម្បីទទួលបានដំណោះស្រាយដែលមានលក្ខណៈប្រាកដនិយម អាច​អនុវត្តបាន និងទទួលបានផលចំណេញទាំងអស់គ្នា រាប់ចាប់តាំងពីអ្នកផលិតពូជស្រូវសុទ្ធ ប្រជា​កសិករ រោងម៉ាស៊ីនកិនស្រូវ និងក្រុមហ៊ុននាំចេញអង្ករ ជាដើម៕ អត្ថបទ៖ ឈិត បូរ៉ាវី