ប្រធានក្រុមការងារចុះមូលដ្ឋានស្រុកសន្ទុកពន្យល់ពីអត្ថប្រយោជន៍កិច្ចសហប្រតិបត្តិការ CLV-DTA ដល់ពលរដ្ឋ

ប្រធានក្រុមការងារចុះមូលដ្ឋានស្រុកសន្ទុក បានពន្យល់អំពីអត្ថប្រយោជន៍ជាច្រើនទាំងផ្នែកសង្គម និងសេដ្ឋ ការអភិវឌ្ឍ និងការរក្សាបាននូវអធិបតេយ្យភាពតាមព្រំដែនទៅដល់ប្រជាជន និង​សមាជិក​-សមាជិកាគណបក្សប្រជាជនក្នុងឃុំទីពោ ចំពោះកិច្ចសហប្រតិបត្តិការ​តំបន់​ត្រីកោណ​អភិវឌ្ឍន៍​កម្ពុជា-ឡាវ-វៀតណាម (CLV-DTA) ខណៈកិច្ចសហប្រតិបត្តិការនេះ​គឺ​មិន​មាន​ការ​ខាត​បង់​ប្រយោជន៍ ឬបាត់បង់​បញ្ហា​ទឹកដី​កម្ពុជា​ដូច​ក្រុម​ប្រឆាំង​ជ្រុលនិ​យម​បំផុស​បំផុល​ព័ត៌មាន​មិនពិត​នោះ​ឡើយ។

លោកជំទាវបណ្ឌិត ជា សិរី សមាជិកគណៈអចិន្ត្រៃយ៍គណៈកម្មាធិការកណ្តាល​គណបក្ស​ប្រជាជន​កម្ពុជា, អនុប្រធានទី២ ក្រុមការងារថ្នាក់កណ្តាលចុះមូលដា្ឋនខេត្តកំពង់ធំ និងជា​ប្រធាន​ក្រុម​ការងារ​ចុះមូលដ្ឋានស្រុកសន្ទុក លើកឡើងបែបនេះ នៅក្នុងពិធីសម្ភោធ ដាក់ឲ្យប្រើប្រាស់​ទីស្នាក់​ការ​គណបក្សឃុំទីពោ ស្ថិតស្រុកសន្ទុក ខេត្តកំពង់ធំ នៅថ្ងៃទី ៧ ខែ កញ្ញា ឆ្នាំ២០២៤នេះ ។

លោកជំទាវបណ្ឌិតបន្តថា កិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) គឺជាកិច្ចសហប្រតិបត្តិការគ្នា ក្នុងនាមប្រទេសជិតខាង ដើម្បីពន្លឿនការអភិវឌ្ឍ ដោយ​ក្នុង​នោះប្រទេសនីមួយៗគឺត្រូវគ្រប់គ្រងទឹកដីរៀងៗខ្លួន។ ដូច្នេះបញ្ហានេះ, មិនមាន​ការ​បាត់បង់ ទឹកដីដូចការបំភ្លៃព័ត៌មានមួយចំនួនពីអ្នកវិភាគគ្មានមូលដ្ឋាន និងក្រុម​ប្រឆាំង​ជ្រុល​និយម​មួយ​ក្ដាប់តូចនោះទេ។

លោកជំទាវបណ្ឌិតបន្ថែមថា ប៉ុន្ដែផ្ទុយមកវិញ កិច្ចសហប្រតិបត្តិការតំបន់ត្រីកោណអភិវឌ្ឍនេះ នឹង​ផ្តល់អត្ថប្រយោជន៍ដល់កម្ពុជាបន្ថែមទៀតដូចជា ជួយលើកស្ទួយវិស័យសេដ្ឋកិច្ច, ពាណិជ្ជកម្ម, ទេសចរណ៍, វិនិយោគ, ថាមពល, វប្បធម៌, និងវិស័យហេដ្ឋរចនាសម្ព័ន្ធ រួមទាំងវិស័យ ផ្សេងៗ​ជា​ច្រើន​ទៀត ជាពិសេសជួយសម្រួលដល់ជីវភាពបងប្អូនប្រជាពលរដ្ឋ ដែលរស់នៅ​ខេត្ត​ជាប់​ព្រំដែន​ទាំង​នោះ​ឱ្យមានជីវភាព កាន់តែប្រសើរឡើង។

ក្នុងឱកាសនោះដែរ, លោកជំទាវបណ្ឌិត ជា សិរី បានអំពាវនាវដល់បងប្អូនប្រជាជន ក៏ដូច​សាធារណ​​ជន សូមកុំស្តាប់ និង ជឿតាមការញុះញង់របស់ក្រុមជ្រុលនិយម និងត្រូវចេះរួបរួម​សាមគ្គី​គ្នា ព្រមទាំងចូលរួមជាមួយរដ្ឋាភិបាល តាមរយៈមូលនិធិកសាង ហេដ្ឋារចនា​សម្ព័ន្ធ​តាម​ព្រំដែន និងសូមបន្តជឿជាក់លើរាជរដ្ឋាភិបាលកម្ពុជា ក្រោមដំបូលនៃសុខសន្តិភាព ដែល​មាន​សម្តេចតេជោ ហ៊ុន សែន មគ្គុទេសឯកនយោបាយឈ្នះ-ឈ្នះ, បិតាស្ថាបនិកសន្តិភាព, ជាប្រធាន​ព្រឹទ្ធសភា និងជាប្រធានគណបក្ស ប្រជាជនកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីដឹកនាំនាវាកម្ពុជាឱ្យកាន់តែរីកចម្រើន៕ អត្ថបទ៖ សុន រ៉ាឌី