អភិបាលខេត្តឧត្ដរមានជ័យ ចុះសួរសុខទុក្ខ និងប្រគល់អំណោយ ជូនវីរកងទ័ពតាមបន្ទាត់ព្រំដែន

ឧត្តរមានជ័យ៖ នៅរសៀលថ្ងៃទី២០ ខែសីហា ឆ្នាំ២០២៥នេះ ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ បានដឹកនាំក្រុមការងារ ចុះសួរសុខទុក្ខ និងនាំយកអំណោយធុងចម្រោះទឹកសេរ៉ាមិច ថ្នាំពេទ្យ និងសម្ភារៈមួយចំនួនទៀត ប្រគល់ជូនដល់បងប្អូនកងទ័ពវីរយុទ្ធជន ដែលកំពុងបំពេញបេសកកម្មយ៉ាងសកម្មក្នុងការការពារបូរណភាពទឹកដី នៅតាមបន្ទាត់ព្រំដែនកម្ពុជា-ថៃ។

ឯកឧត្ដម មាន ចាន់យ៉ាដា បានលើកឡើងថា ការផ្តល់ជូននេះ គឺជាការរួមចំណែកដ៏មានន័យក្នុងការលើកកម្ពស់សុខុមាលភាព និងអនាម័យរបស់វីរកងទ័ព ដែលតែងតែប្រឈមមុខនឹងការលះបង់ និងការលំបាកជាច្រើន។ធុងចម្រោះទឹកស្អាតទាំងនេះ នឹងជួយធានាឲ្យពួកគាត់មានទឹកស្អាត និងមានសុវត្ថិភាពប្រើប្រាស់ ក្នុងតំបន់ដែលកំពុងខ្វះខាតការផ្គត់ផ្គង់ទឹកស្អាត។នៅក្នុងឱកាសនោះ ឯកឧត្ដម មាន ចាន់យ៉ាដា បានថ្លែងនូវការកោតសរសើរ និងវាយតម្លៃខ្ពស់ ចំពោះវីរភាព ក៏ដូចជាកម្លាំងកាយចិត្តរបស់បងប្អូនកងទ័ព ដែលបានលះបង់សេចក្តីសុខផ្ទាល់ខ្លួន ឃ្លាតឆ្ងាយពីក្រុមគ្រួសារ ដើម្បីឈរជើងការពារព្រំដែនយ៉ាងអង់អាចក្លាហាន ធានាបាននូវសុវត្ថិភាព និងសន្តិភាពសម្រាប់ប្រជាជនទាំងមូល។

ឯកឧត្ដម អភិបាលខេត្ត ក៏បានផ្តាំផ្ញើឲ្យបងប្អូនកងទ័ពទាំងអស់ត្រូវតែប្រុងប្រយ័ត្នខ្ពស់ក្នុងការបំពេញភារកិច្ច និងថែរក្សាសុខភាពផ្ទាល់ខ្លួនឲ្យបានល្អប្រសើរ ដើម្បីបន្តបេសកកម្មដ៏ឧត្ដុង្គឧត្ដមនេះ។

ជាមួយគ្នានេះ ឯកឧត្ដម បានលើកទឹកចិត្តឲ្យបងប្អូនកងទ័ពត្រូវមានស្មារតីសាមគ្គីគ្នាជាធ្លុងមួយ ជួយយកអាសាគ្នាទៅវិញទៅមក ហើយត្រូវអនុវត្តតាមបទបញ្ជាយ៉ាងម៉ឺងម៉ាត់ ដើម្បីធានាបាននូវសុវត្ថិភាព សន្តិភាព និងការអភិវឌ្ឍប្រកបដោយចីរភាពជូនជាតិមាតុភូមិ។ឃិនសារិទ្ធ