ឱកាសការងារជាង៣ម៉ឺនកន្លែង​នឹងដាក់តំាងបង្ហាញ​​​ ក្នុងពិព័រណ៍ការងារនិងផលិតភាពជាតិ នាដើមខែវិច្ឆិកាខាងមុខ

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ គ្រោង​នឹង​រៀប​ចំ “ពិព័រណ៍ការងារ និងផលិតភាពជាតិ ឆ្នាំ២០២៥” នាថ្ងៃទី១ និងទី២ ខែវិច្ឆិកា ឆ្នាំ​២០២៥​ខាង​មុខនេះ នៅអគារពិព័រណ៍កោះពេជ្រ ជាមួយឱកាសការងារចំនួនជាង ៣ម៉ឺនកន្លែង ពី​ក្រុមហ៊ុន រោងចក្រ និងសហគ្រាសធំៗចំនួន១៥០។

ប្រភពក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ពិព័រណ៍ការងារ និង​ផលិត​ភាព​ជាតិ​ឆ្នាំ២០២៥ ត្រូវបានសហការរៀបចំ ដោយទីភ្នាក់ងារជាតិមុខរបរ និងការងារ សហភាព​សហព័ន្ធ​យុវជនកម្ពុជារាជធានីភ្នំពេញ សមាគមវាយនភណ្ឌ សម្លៀកបំពាក់ ស្បែកជើង និង​ផលិត​ផល​ធ្វើ​ដំណើរ​នៅកម្ពុជា និងទទួលបានការគាំទ្រដោយអង្គការអន្តរជាតិខាងការងារ (ILO) ទីភ្នាក់​ងារសហប្រតិបត្តិការអន្តរជាតិកូរ៉េ (KOICA) មូលនិធិអភិវឌ្ឍន៍ជំនាញ និង​សមាគម​សហ​គ្រិន​វ័យ​ក្មេង​កម្ពុជា ព្រមទាំងដៃគូពាក់ព័ន្ធជាច្រើនទៀត។ ព្រឹត្តការណ៍នេះ មានគោលបំណង ដើម្បី​បន្ត​រក្សាតុល្យភាពក្នុងទីផ្សារការងារតាមរយៈការជួយជ្រោមជ្រែងនិយោជក ដែលមាន​តម្រូវ​ការ​ជ្រើស​រើស​កម្លាំងពលកម្ម និងអ្នកស្វែងរកការងារធ្វើ ក៏ដូចជា បង្កើតឱ្យមានវេទិកា​ការងារ​ជួប​ជុំ​គ្នា​នៅ​មួយ​កន្លែង ដោយងាយស្រួល រវាងអ្នកស្វែងរកការងារ និយោជក អ្នកផ្តល់ការ​អប់រំ​បណ្ដុះ​បណ្ដាល​ និងដៃគូពាក់ព័ន្ធនានា ដើម្បីធ្វើការផ្លាស់ប្ដូរ និងចែករំលែកព័ត៌មានទីផ្សារការងារ។

ក្រសួង​ការងារ និងបណ្តុះបណ្តាលវិជ្ជាជីវៈ បានអំពាវនាវដល់យុវជន សិស្ស/និសិ្សត និង​អ្នក​ស្វែង​រក​ការងារ កុំភ្លេចត្រៀមប្រវត្តិរូបសង្ខេប (CV) ឱ្យបានច្រើន ដើម្បីចូលរួមដាក់ពាក្យ និង​សម្ភាស​ការងារ​ភ្លាម​ៗ​ជាមួយតំណាងក្រុមហ៊ុនធំៗជាច្រើន និងអាចចូលរួមក្នុង​សិក្ខាសា​លា​អំ​ពី​ការ​លើក​កម្ពស់​ផលិត​ភាពដែលមានការចែករំលែកចំណេះដឹង និងបទ​ពិសោធន៍​ល្អ​ៗ​ពី​សំណាក់​វា​គ្មិន​ជំនាញ​ជា​ច្រើន​ផងដែរ។

សូមបញ្ជាក់ថា ព្រឹត្តិការណ៍ការងារនាពេលខាងមុខនេះ នឹងប្រមូលផ្តុំនិយោជក​ធំៗ​គ្រប់​វិស័យ​ប្រមាណ​១៥០ ដែលរំពឹងថា បើកឱកាសការងារថ្មីៗថែមទៀតចំនួនជាង ៣ម៉ឺនកន្លែង ដើម្បី​ប្រកាស​ជ្រើសរើសបេក្ខជនគ្រប់មុខតំណែង ស្របតាមចំណេះ ជំនាញ និងសមត្ថភាព។ ក្នុង​នោះ​វិស័យ​នាំ​មុខគេរួមមាន៖ ធនាគារ គ្រឹះស្ថានមីក្រូហិរញ្ញវត្ថុ និងធានារ៉ាប់រង , សេវាកម្មលក់ដុំ និង​រាយ, ទេសចរណ៍ និងបដិសណ្ឋារកិច្ច, ម្ហូបអាហារនិងភេសជ្ជៈ , អចលនទ្រព្យ , សេវាកម្ម និង​វិស័យ​ឧស្សាហកម្ម និងកម្មន្តសាលជាដើម៕ អត្ថបទ៖ ឈិត បូរ៉ាវី