ក្រុមការងារបច្ចេកទេសចុះពិនិត្យ អង្កេត និងវាស់វែងលម្អិតទីតាំងភូមិសាស្ត្រ​គម្រោងព្រែក​ជីកហ្វូណន​តេជោ (កំណាត់ទី ២) ក្នុងភូមិសាស្រ្តខេត្តកណ្តាល និងតាកែវ

ចាប់ពីថ្ងៃទី០១ ដល់ ថ្ងៃទី១១ ខែតុលា ឆ្នាំ២០២៥ ក្រុមការងារបច្ចេកទេសបានចុះពិនិត្យ អង្កេត និង​វាស់វែងលម្អិតទីតាំងភូមិសាស្ត្រ នៃគម្រោងព្រែកជីកហ្វូណនតេជោ (កំណាត់ទី២) ភូមិសាស្រ្ត​ខេត្តកណ្តាល និងខេត្តតាកែវ ដោយមានការចូលរួម​ពី​មន្ត្រី​ជំនាញ​អគ្គ​នាយក​ដ្ឋាន​ដឹក​ជញ្ជូន​ផ្លូវ​ទឹក ផ្លូវសមុទ្រ និងកំពង់ផែ តំណាងអគ្គនាយកដ្ឋាន​ដោះស្រាយ​ផល​ប៉ះពាល់​ដោយ​សារ​គម្រោង​អភិវឌ្ឍន៍ នៃក្រសួងសេដ្ឋកិច្ច និងហិរញ្ញវត្ថុ រដ្ឋបាលភូមិ-ឃុំ-ស្រុក អាជ្ញាធរពាក់ព័ន្ធ និង​ប្រជា​ពលរដ្ឋ​ជាច្រើនរូបផងដែរ។

បេសកកម្មនេះធ្វើឡើងក្នុងគោលបំណង ដើម្បីពិនិត្យ ពិភាក្សា ពីបញ្ហាប្រឈម និងស្វែងរក​ដំណោះ​ស្រាយ​ ការប្រមូលនូវមតិយោបល់ សំណើ និងសំណូមពរបស់​ប្រជាពលរដ្ឋ​ដែល​រង​ផល​ប៉ះ​ពាល់​ ចងក្រងទិន្នន័យ ដើម្បីដាក់ជូនថ្នាក់ដឹកនាំពិនិត្យ និងដោះស្រាយទៅតាមនិតិវិធីច្បាប់ សំ​ដៅ​ធានា​នូវការសម្រេច និងដោះស្រាយប្រកបដោយបានតម្លាភាព និងប្រសិទ្ធ​ភាព​ក្នុង​ការ​អនុវត្ត​គម្រោង​៕