គណៈប្រតិភូសភាកម្ពុជានិយាយភាសាបារាំង ជួបសំណេះសំណាលជាមួយនិស្សិតកម្ពុជា កំពុងសិក្សានៅប្រទេសឡាវ

ឯកឧត្ដម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម (គណៈកម្មការទី២) នៃរដ្ឋសភា និងជាប្រធានក្រុមសភាកម្ពុជានិយាយភាសាបារាំង (APF), ឯកឧត្ដម អ៊ុ សារិទ្ធ ប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃព្រឹទ្ធសភា, លោកជំទាវ មុំ សណ្ដាប់ សមាជិកាគណៈកម្មការនីតិកម្ម និងយុត្តិធម៌ (គណៈកម្មការទី៦) នៃព្រឹទ្ធសភា និងជាសមាជិកក្រុមសមាជិកព្រឹទ្ធសភាប្រចាំភូមិភាគទី១ និងលោកជំទាវ យស ថានារី តំណាងរាស្ត្រមណ្ឌលខេត្តកំពង់ធំ នៅថ្ងៃទី២៣ ខែតុលា ឆ្នាំ២០២៥ បានអញ្ជើញជួបសំណេះសំណាល និងពិសាអាហារពេលល្ងាចជាមួយនិស្សិតខ្មែរ កំពុងសិក្សានៅសាធារណរដ្ឋប្រជាធិបតេយ្យប្រជាមានិតឡាវ។

ឯកឧត្តម ឈាង វុន បានផ្តាំផ្ញើការសាកសួរទុក្ខពីថ្នាក់ដឹកនាំសភា និងរាជរដ្ឋាភិបាលដែលតែងយកចិត្តទុកដាក់ដល់និស្សិតទាំងអស់ដែលកំពុងសិក្សានៅបរទេស។ ឯកឧត្តមបានណែនាំដល់និស្សិតឱ្យយកចិត្តទុកដាក់រៀនសូត្រ ដើម្បីយកចំណេះ និងជំនាញ ត្រឡប់ទៅបម្រើសង្គមជាតិ និងជួយអភិវឌ្ឍប្រទេសឱ្យរីកចម្រើនឡើង។

ក្នុងឱកាសនោះដែរ ឯកឧត្ដម ហ៊ុលក្រង ផាណង ឯកអគ្គរាជទូតនៃព្រះរាជាណាចក្រកម្ពុជា ប្រចាំទីក្រុងវៀងចន្ទន៍ បានទទួលបដិសណ្ឋារកិច្ចយ៉ាងកក់ក្ដៅចំពោះគណៈប្រតិភូ និងចូលរួមក្នុងពីធីសំណេះសំណាល និងពិសាអាហារពេលល្ងាចរួមគ្នា ប្រកបដោយបរិយាកាសរីករាយ និងស្និទ្ធស្នាលជាទីបំផុត៕