គណៈកម្មការទី៤ រដ្ឋសភា ប្រជុំផ្ទៃក្នុងពិនិត្យសេចក្តីព្រាងច្បាប់ «ស្តីពីកាតព្វកិច្ចយោធា» ដើម្បីពង្រឹងវិស័យការពារជាតិ និងស្មារតីស្នេហាជាតិ

ភ្នំពេញ៖ ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា (គណៈកម្មការទី៤) នៅព្រឹកថ្ងៃទី២៩ ខែមេសា ឆ្នាំ២០២៦នេះបានអញ្ជើញជាអធិបតីភាពដឹកនាំ កិច្ចប្រជុំផ្ទៃក្នុង ដើម្បីពិនិត្យ និងសិក្សាលម្អិត លើសេចក្តីព្រាងច្បាប់ “ស្តីពីកាតព្វកិច្ចយោធា”។

សេចក្តីព្រាងច្បាប់នេះ គឺជាឧបករណ៍គតិយុត្តដ៏សំខាន់ ក្នុងគោលបំណងពង្រឹងប្រសិទ្ធភាពវិស័យការពារជាតិ ក៏ដូចជាការបណ្តុះស្មារតីស្នេហាជាតិ និងការទទួលខុសត្រូវចំពោះមាតុភូមិដល់ប្រជាពលរដ្ឋគ្រប់រូប។

ខ្លឹមសារសំខាន់ៗនៃសេចក្តីព្រាងច្បាប់“ស្តីពីកាតព្វកិច្ចយោធា” រួមមាន៖

• គោលការណ៍អនុវត្ត៖ កំណត់វិធានការអនុវត្តកាតព្វកិច្ចយោធា ដើម្បីរួមចំណែកក្នុងបុព្វហេតុការពារសន្តិសុខជាតិ និងការកសាងមាតុភូមិឱ្យកាន់តែរឹងមាំ។

• លក្ខខណ្ឌអាយុ និងភេទ៖ ប្រជាពលរដ្ឋខ្មែរភេទប្រុសដែលមានអាយុចាប់ពី ១៨ ដល់ ២៥ឆ្នាំ ត្រូវមានកាតព្វកិច្ចបំពេញសេវាយោធា។ ដោយឡែក ចំពោះស្ត្រី ត្រូវបានអនុញ្ញាតឱ្យចូលរួមតាមគោលការណ៍ “ស្ម័គ្រចិត្ត”។

• ករណីសញ្ជាតិច្រើន៖ សម្រាប់ប្រជាពលរដ្ឋដែលមានសញ្ជាតិច្រើន ហើយកំពុងស្នាក់នៅ និងរស់នៅក្នុងព្រះរាជាណាចក្រកម្ពុជា ត្រូវមានកាតព្វកិច្ចបំពេញយោធានៅក្នុងកម្ពុជាដូចប្រជាពលរដ្ឋទូទៅ។

• រយៈពេលបំពេញកាតព្វកិច្ច៖ រយៈពេលនៃការបំពេញកាតព្វកិច្ចយោធាត្រូវបានកំណត់ចំនួន ២៤ខែ (និងអាចបន្តបន្ថែមបានអតិបរមា ៦ខែ ក្នុងករណីចាំបាច់បំផុត)។

សេចក្តីព្រាងច្បាប់ ស្តីពីកាតព្វកិច្ចយោធា មាន ៨ ជំពូក និង ២០ មាត្រា ត្រូវបានគណៈរដ្ឋមន្ត្រីអនុម័តកាលពីថ្ងៃទី២៣ ខែមេសា ឆ្នាំ២០២៦ និង ត្រូវបានគណៈកម្មាធិការអចិន្ត្រៃយ៍រដ្ឋសភា សម្រេចប្រគល់ភារកិច្ចជូនគណៈកម្មការទី៤ ដើម្បីធ្វើការសិក្សាលម្អិតស៊ីជំរៅ កាលពីថ្ងៃទី២៨ ខែមេសា ឆ្នាំ២០២៦ម្សិលមិញនេះ។