ទំហំពាណិជ្ជកម្មអន្តរជាតិកម្ពុជាសម្រេចបានជាង ៣០ពាន់លានដុល្លារអាម៉េរិក ក្នុងរយៈ៥ខែឆ្នាំនេះ

ភ្នំពេញ៖ ការដោះដូរទំនិញអន្តរជាតិរបស់កម្ពុជាជាមួយដៃគូពាណិជ្ជកម្មអន្តរជាតិសំខាន់ៗជុំវិញពិភពលោក បង្ហាញពីកំណើនគួរឱ្យកត់សម្គាល់ដោយសម្រេចបាន​ជាង ៣០ពាន់លាន​ដុល្លារអាម៉េរិក ក្នុងរយៈពេល ៥ខែដើមឆ្នាំ២០២៦នេះ កើនឡើង ១៩% បើធៀបនឹងរយៈពេល​ដូចគ្នាកាលពីឆ្នាំមុន​។ ក្នុងនោះ កម្ពុជាបាននាំចេញទំនិញទៅទីផ្សារអន្តរជាតិគិតជាប្រាក់បានចំនួន​ជាង ១៤ពាន់លាន​ដុល្លារអាម៉េរិក ខណៈ​ កម្ពុជានាំចូលមកវិញ​សម្រេចបាន​ជាង ១៦ពាន់លាន​ដុល្លារអាម៉េរិក កើនឡើង ១៩% ដូចគ្នា។​

របាយការណ៍របស់អគ្គនាយកដ្ឋានគយ ​និងរដ្ឋាករកម្ពុជា ​បានផ្សាយនៅ​ថ្ងៃទី ១០ មិថុនានេះ បានបញ្ជាក់ថា ការធ្វើពាណិជ្ជកម្មរបស់កម្ពុជាជាមួយដៃគូអន្តរជាតិសំខាន់ៗ ចាប់ពីខែមករា ដល់ ខែឧសភា ឆ្នាំ២០២៦ សម្រេចបានកំណើនជាវិជ្ជាមាន ក្នុងទំហំ​ទឹកប្រាក់ចំនួនជាង​ ៣០,០៨ពាន់លាន​ដុល្លារអាម៉េរិក កើនឡើង ១៨,៩% បើធៀបនឹងរយៈពេលដូចគ្នាកាលពីឆ្នាំមុន​។ ក្នុងនោះ កម្ពុជា បាននាំចេញទំនិញគិតជាប្រាក់​ចំនួនជាង ១៤,០៤ ពាន់លាន​ដុល្លារអាម៉េរិក កើន ១៩,០% ខណៈកម្ពុជានាំចូលមកវិញក្នុងទំហំទឹកប្រាក់ចំនួនជាង ១៦,០៣ ពាន់លាន​ដុល្លារអាម៉េរិក​ កើន ១៨,៩% បើធៀបនឹងរយៈពេល​ដូចគ្នាកាលពីឆ្នាំមុន​។​

របាយការណ៍នេះ បានបញ្ជាក់ទៀតថា ក្នុងអំឡុងពេលនេះ កម្ពុជាបាន​ធ្វើពាណិជ្ជកម្មជាមួយ​ដៃគូពាណិជ្ជកម្មសំខាន់ៗបំផុតទាំង ២០ រួមមាន ប្រទេសចិន, សហរដ្ឋអាម៉េរិក, វៀតណាម, ជប៉ុន, ថៃ, សិង្ហបុរី, ម៉ាឡេស៊ី, ឥណ្ឌូនេស៊ី, កាណាដា, និងអេស្ប៉ាញ, និងបណ្តាប្រទេសជាដៃគូសំខាន់ៗចំនួន ១០ផ្សេងទៀត។​ ទំនិញសំខាន់ៗ​របស់កម្ពុជា ​ដែលបាន​នាំចេញទៅទីផ្សារ​អន្តរជាតិ ​មាន​ដូចជា សំបកកង់រថយន្ត, ​គ្រឿងបន្លាស់, គ្រឿងបង្គុំគ្រឿងអគ្គិសនី, សង្ហារឹម, សម្លៀកបំពាក់ ស្បែកជើង និងសម្ភារ​ធ្វើដំណើរ និងទំនិញសំខាន់ៗមួយ​ចំនួនទៀត។​​

ក្នុង​ឆ្នាំ ២០២៥កន្លងទៅ ​ទំហំពាណិជ្ជកម្មអន្តរជាតិរបស់កម្ពុជា សម្រេច​បាន​នូវ​ទំហំ​ទឹក​ប្រាក់​ ៦៥,២៥ ​ពាន់​លានដុល្លារ​ កើនឡើង ​១៨% ​ធៀបនឹងឆ្នាំ ​២០២៤ ​ក្នុងនោះ ​កម្ពុជា​នាំចេញ​ទៅទីផ្សារអន្តរជាតិសម្រេចបាន ៣១,២៨ ពាន់លានដុល្លារ កើន​ឡើង ១៧% ​និង ​នាំ​ចូលមកវិញ​មានតម្លៃជាប្រាក់ ​៣៣,៩៦ ​ពាន់លានដុល្លារ កើនឡើង ១៨%។នេះបើតាមរបាយការណ៍របស់ក្រសួងពាណិជ្ជកម្ម​៕អត្ថបទ៖ ធូ វិរៈ