សមត្ថកិច្ចឃាត់ខ្លួនមនុស្ស៧នាក់ ដកហូតស៊ីមកាតបរទេសរាប់ម៉ឺនស៊ីមពាក់ព័ន្ធ (Online Scams

ភ្នំពេញ៖ កម្លាំងសមត្ថកិច្ចខណ្ឌចំការមនបានបើកប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ចំនួនពីរនៅក្នុងបុរីរីវើរ៉ា និងបុរីដាយមិនវ័ន ដោយបានឃាត់ខ្លួនជនសង្ស័យចំនួន ៧នាក់ និងដកហូតស៊ីមកាតបរទេសរាប់ម៉ឺនស៊ីម រួមទាំងវត្ថុតាងជាច្រើន។ ការបង្ក្រាបនេះបានធ្វើឡើងកាលពីថ្ងៃទី២០ ខែសីហា ឆ្នាំ២០២៦ នៅទីតាំងចំនួនពីរក្នុងខណ្ឌចំការមន។

កិច្ចប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ក្រោមការដឹកនាំដោយលោក កៀង ល័ក្ស អភិបាល នៃគណៈអភិបាលខណ្ឌចំការមន និងជាប្រធានគណៈបញ្ជាការឯកភាពខណ្ឌ និងដោយមានការសម្របសម្រួលផ្លូវច្បាប់ពី លោក ទិន សុចិត្រា ព្រះរាជអាជ្ញារង នៃអយ្យការអមសាលាសាលាដំបូងរាជធានីភ្នំពេញ ក្រុមការងារសមត្ថកិច្ចចម្រុះបានចុះត្រួតពិនិត្យទីតាំងគោលដៅចំនួន ២ កន្លែង។

ជាលទ្ធផលនៃការចុះប្រតិបត្តិការរួមមាន៖

 ទីតាំងទី១. នៅបុរីរីវើរ៉ា កោះពេជ្រ – ផ្ទះលេខ I50) ឃាត់ខ្លួនជនជាតិខ្មែរ ចំនួន ០៣នាក់ (ប្រុស)

ដកហូតកុំព្យូទ័រ All-in-One ចំនួន ២០៤ គ្រឿង ទូរស័ព្ទដៃ ចំនួន ១,៥៥០ គ្រឿង ម៉ូនីទ័រចំនួន ០៣ គ្រឿង និងស៊ីភីយូ ០៣ គ្រឿង ស៊ីមកាតបរទេសមួយចំនួនធំ (រាប់ម៉ឺនស៊ីម)។

 ទីតាំងទី២. នៅបុរីដាយមិនវ័ន – ផ្ទះលេខ S55 ឃាត់ខ្លួនជនសង្ស័យចំនួន ០៤នាក់ (ស្រី ០១នាក់) មាន ២ សញ្ជាតិ គឺចិន ០៤នាក់ ស្រី ០១នាក់ និងខ្មែរ ០៣នាក់ប្រុស។ ដកហូតកុំព្យូទ័រ All-in-One ចំនួន ៣១ គ្រឿង Laptop ចំនួន ០២ គ្រឿង និងម៉ូនីទ័រ ០៣ គ្រឿង ទូរស័ព្ទដៃ ចំនួន ២១១ គ្រឿង។

ចំពោះមនុស្សសរុបចំនួន ០៧នាក់ និងវត្ថុតាងទាំងអស់ ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តចាត់ការតាមនីតិវិធីច្បាប់។

ជាមួយគ្នានេះ រដ្ឋបាលខណ្ឌចំការមនបានអំពាវនាវដល់ប្រជាពលរដ្ឋទាំងអស់ជួយផ្ដល់ព័ត៌មានមកកាន់សមត្ថកិច្ចមូលដ្ឋានជាបន្ទាន់ ប្រសិនបើមានសង្ស័យអំពីសកម្មភាពមិនប្រក្រតី ឬបទល្មើសបច្ចេកវិទ្យាណាមួយនៅក្នុងមូលដ្ឋានរបស់លោកអ្នក ដើម្បីរួមចំណែករក្សាសន្តិសុខ សុវត្ថិភាព និងសណ្តាប់ធ្នាប់សង្គមឱ្យកាន់តែល្អប្រសើរឡើង៕ អត្ថបទ៖ វង្ស សុភាព