ក្រសួងបរិស្ថាន បានពង្រឹងការត្រួតពិនិត្យគុណភាពទឹកសាធារណៈសរុបចំនួន ៧៧ទីតាំង នៅក្នុងខែកក្កដា ឆ្នាំ​​២០២៦

ភ្នំពេញ៖ ក្រុមការងារជំនាញក្រសួងបរិស្ថាន នៅក្នុងខែកក្កដា ឆ្នាំ២០២៦ បានពិនិត្យតាមដានគុណភាពទឹ​​ក​​​​​​សាធា​​រណៈ និងទឹកកខ្វក់សម្អាតរួចពីទីតាំងស្ថានីយប្រព្រឹត្តកម្ម លើទីតាំងអាទិភាពសរុប៧៧ទីតាំង ដែលក្នុងនោះរួមមាន៖​​ទឹ​​ក​​ទន្លេ បឹងទន្លេសាប ស្ទឹង អាងស្តុកទឹក បឹង ជ្រោះមាន ៥២ទីតាំង ទឹកសមុទ្រមា​​ន១២ទីតាំង និងទឹកក​​ខ្វ​​ក់​​​​ស​​ម្អាតរួចមាន១៣ទីតាំង ព្រមទាំងបានយកសំណាកទឹកចំនួន ៧៧សំណាក។ ស្ថានភាពគុណភាពទឹកសាធារណៈជារួម ទឹកមានសភាពល្អក់ដោយសារមានភ្លៀងធ្លាក់ និងយោងតាមលទ្ធផលវិភាគពីមន្ទីរពិ​​សោ​​ធន៍ បង្ហាញថា គុណភាពទឹកសាធារណៈ បានអនុលោមតាមស្តង់ដាពុំមានអ្វីប្រែប្រួល ឬ បង្កឱ្យមានការបំពុលគួរឱ្យកត់សម្គាល់នោះទេ។ ដោយទ្បែក ទឹកកខ្វក់សម្អាតរួច ចេញពីទីតាំងអាងប្រព្រឹត្តកម្មរួមទាំង១៣ ទីតាំង អនុលោមតាមស្តង់ដាអនុញ្ញាតបញ្ចេញ។

ក្នុងពេលជាមួយគ្នានេះដែរ ក្រុមការងារក្រសួងបរិស្ថានបានចុះត្រួតពិនិត្យតាមដានតំបន់ងាយរងការបំពុលទឹក បានចំនួន ១២ទីតាំង នៅខេត្តព្រះសីហនុ (ក្បែរតំបន់សេដ្ឋកិច្ចពិសេសបិតត្រាំង ១ទីតាំង ស្ពានព្រែកទឹកសាប ១ ទីតាំង ព្រែកទឹកសាប ផ្នែកខាងក្រោមតំបន់សេដ្ឋកិច្ចពិសេស១ទីតាំង និងអាងស្តុកទឹកក្បាយឆាយ ១ទីតាំង) ខេត្តកំពង់ធំ (ស្ទឹងជីនិត ៤ទីតាំង ស្ពានក្រាំង ស្ពានបាក់ស្នា តំបន់ ១មករា និងស្ពានកំពង់ថ្មថ្មី) នៅខេត្តកំពង់ស្ពឺ (ស្ទឹងព្រែកត្នោត ៤ទីតាំង ស្ពានគុណគ្រូ ស្ពានសាមគ្គីទ្វារ ទឹករលាំងជ្រៃ និងស្ពានថ្មីក្រុងច្បារមន) និងបានយកសំណាកទឹកមកវិភាគចំនួន ១២សំណាក។ យោងតាម លទ្ធផលពីមន្ទីរពិសោធន៍ បង្ហាញថា គុណភាពទឹកនៅគ្រប់ទីតាំងទាំងអស់ គឺបានអនុលោមស្តង់ដារ ពុំមានអ្វីប្រែប្រួល ឬ បង្កឱ្យមានការបំពុល គួរឱ្យកត់សម្គាល់នោះទេ។

លើសពីនេះ ក្នុងខែកក្កដា ឆ្នាំ២០២៦ ក្រុមការងារបានចុះពិនិត្យការបំពាក់ និងផ្ទៀងផ្ទាត់ដំណើរការឧបករណ៍តាមដានស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ ចំនួន ៧ក្រុមហ៊ុន នៅរាជធានីភ្នំពេញ លើចំនួនទីសរុបចំនួន៦៤ នៅទូទាំងប្រទេស។ លទ្ធផលនៃការពិនិត្យជារួមឧបករណ៍តាមដានស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវពីអាងប្រព្រឹត្តកម្មមានដំណើរការជាប្រក្រតី ក្នុងនោះមាន ៦ក្រុមហ៊ុន អនុលោមតាមស្តង់ដារ និងមាន១ក្រុមហ៊ុនត្រូវបាន ក្រុមការងារបានយកសំណាកទឹក (សំណល់រាវ) ក្រោយប្រព្រឹត្តិកម្មសម្អាតចំនួន ៧ សំណាក មកពិនិត្យផ្ទៀងផ្ទាត់នៅមន្ទីរពិសោធន៍របស់ក្រសួង។ ជាលទ្ធផលសំណាកទឹកទាំង ៧ក្រុមហ៊ុន បានរកឃើញអនុលោមស្តង់ដាបញ្ចេញ។

សូមបញ្ជាក់ថា នៅក្នុងខែកក្កដា ឆ្នាំ២០២៦នេះ ក្រសួងបរិស្ថាន បានខិតខំបំពេញតួនាទី ភារកិច្ចយ៉ាងសស្រាក់សស្រាំ ដើម្បីចូលរួមអនុវត្តផែនការយុទ្ធសាស្ត្រនិងផែនការអភិវឌ្ឍន៍ជាតិ កម្មវិធីកំណែទម្រង់របស់រាជរដ្ឋាភិបាល យុទ្ធសាស្រ្តបញ្ចកោណដំណាក់កាលទី១ ជាពិសេសយុទ្ធសាស្ត្រចក្រាវិស័យបរិស្ថាន ក្នុងការពង្រឹងការត្រួតពិនិត្យគុណភាពទឹកដើម្បីភាពស្អាត នៅកម្ពុជា៕