អ្នកវិភាគ៖ សន្និសីទ ISC មានសារសំខាន់​សម្រាប់កម្ពុជាបង្ហាញ​ទៅពិភពលោក​ពីតម្លៃ​ការគោរព​ច្បាប់អន្តរជា​​តិ

កម្ពុជានឹងរៀបចំធ្វើជាម្ចាស់ផ្ទះសន្និសីទប្រធានសភា នៃអន្តរសភា (ISC) លើកទី២ ចាប់ពី​ថ្ងៃទី​២៦​ដ​​​​ល់​​ថ្ងៃ​​ទី២៨ ខែសីហា ឆ្នាំ២០២៦ ស្ថិតនៅរាជធានីភ្នំពេញ។ ជាមួយគ្នានេះ អ្នកវិភាគយល់​ឃើញ​ថា ការរៀ​​បចំសន្និសីទនេះ ពិតជាមានសារសំខាន់ណាស់សម្រាប់ប្រទេសកម្ពុជា​បង្ហាញពី​សមត្ថភាព គោលកា​​រណ៍​​ ជា​​ពិសេសតម្លៃសន្តិភាពនៅក្នុងតំបន់ និងពិភពលោក តាមរយៈ​ការ​គោរព​ច្បាប់អន្តរជាតិ។

មានប្រសាសន៍ក្នុងកិច្ចសម្ភាសជាមួយBTV នៅព្រឹកថ្ងៃទី២៥ខែសីហានេះ លោកបណ្ឌិត ស៊ឺន សំ អ្នក​​វិភាគគោលនយោបាយអន្តរជាតិ នៅរាជបណ្ឌិត្យសភាកម្ពុជា បានឲ្យដឹងថា តាមការកត់សំគាល់ ខ្ញុំគិតថា​​ ការណ៍ដែលប្រទេសកម្ពុជារៀបចំធ្វើជាប្រធានកិច្ចប្រជុំសភា នៃអន្តរសភា គឺប្រទេសកម្ពុជាបានដើរតួនា​​ទីជាអ្នកសម្របសម្រួល ហើយបញ្ចេញសម្លេងក្នុងនាមប្រធាន នៃកិច្ចប្រជុំ ដើម្បីផ្សាយទៅកាន់សហគមន៍អ​​ន្តរជាតិ ឲ្យបានដឹងលឺពីកង្វល់របស់ប្រទេសកម្ពុជា ដែលជាប្រទេសមួយតែងតែប្រកាន់ភ្ជាប់នូវសន្តិភាព អធិបតេយ្យភាព ក៍ដូចជាស្ថេរភាពនៅក្នុងតំបន់ និងពិភពលោក ដូច្នេះហើយ ខ្ញុំគិតថា កិច្ចប្រជុំនៅពេលនេះ ​​ពិតជាមានសារណាស់សម្រាប់ប្រទេសកម្ពុជា ក្នុងការបង្ហាញសំឡេង សមត្ថភាព គោលការណ៍ គោលជំហរ ជាពិសេសតម្លៃសន្តិភាព ដោយប្រទេសនានាក្នុងពិភពលោករស់នៅចុះសម្រុងគ្នា តាមរយៈការគោ​​រពច្បា​​​​ប់អន្តរជាតិ។

ប្រទេសកម្ពុជា នឹងធ្វើជាម្ចាស់ផ្ទះសន្និសីទប្រធានសភា នៃអន្តរសភា លើកទី២ ចាប់ពីថ្ងៃទី២៦-២​​៨​​ ខែសីហា ឆ្នាំ២០២៦ ស្ថិតនៅសាលសន្និសីទ នៃអគ្គនាយកដ្ឋានពន្ធដារ រាជធានីភ្នំពេញ ក្រោមមូលប​​ទ«​សាមគ្គីភាពដើម្បីសន្តិភាព និងវិបុលភាពរួម៖ ពង្រឹងច្បាប់អន្តរជាតិ និងដោះស្រាយជម្លោះដោយសន្តិវិធី»។ សន្និសីទនេះ នឹងមានការចូលរួមពីប្រធានសភា តំណាងប្រធានសភា ប្រធានអង្គការអន្តរសភា អង្គកា​​រអន្តរជាតិពាក់ព័ន្ធ និងគណៈប្រតិភូមកពីប្រទេសនៅទ្វីបអាស៊ី អឺរ៉ុប អាហ្រ្វិក មជ្ឈិមបូព៌ា អូសេឡានី និងអាម៉េ​​រិកឡានទីន។

គួរបញ្ជាក់ដែរថា សន្និសីទប្រធានសភានៃអន្តរសភា គឺជាវេទិកាការទូតសភាកម្រិតខ្ពស់លក្ខណៈអន្ត​​រជាតិ ដែលបង្កើតឡើងក្នុងគោលបំណងប្រមូលផ្តុំថ្នាក់ដឹកនាំស្ថាប័ននីតិប្បញ្ញត្តិមកពីបណ្តាប្រទេសនា​​នាដើ​​ម្បីជជែកពិភាក្សានិងស្វែងរកដំណោះស្រាយរួមលើបញ្ហាប្រឈមជាសកល៕ អត្ថបទ៖ទូច សោភ័ណ