ឯកឧត្តម ហ៊ុន ម៉ានី៖ «យុវជនខ្មែរគ្រប់ជំនាន់ ជាអ្នកបន្តរែកពន់ជោគវាសនាជាតិ ពី​អ្នក​ជំនាន់មុន​»

នេះជាប្រសាសន៍ ឯកឧត្តម ហ៊ុន ម៉ានី អគ្គ​លេខាធិការ​នៃ​អគ្គធិការ​ដ្ឋាន​គណៈ​ចលនា​មហាជន​នៃ​គណៈ​ក​ម្មាធិការកណ្តាល គណបក្សប្រជាជនកម្ពុជា ថ្លែងក្នុងបាឋកថាជាស៊េរី «កេរដំណែលរស់៖ គុណ​តម្លៃ ៧មករា» ក្រោមប្រធានបទ «ដំណើរជីវិត និងការតស៊ូការពារសមិទ្ធផល ៧ មករា ១៩៧៩ ដើម្បីបុព្វហេតុជាតិ និងប្រជាជន» របស់ឯកឧត្តម ណាំ ទុំ នៅសាលប្រជុំ នៃវិមាន ៧ មករា​។

ផ្សារភ្ជាប់នឹងការលើកឡើងខាងលើនេះ ឯកឧត្តមបានគូសបញ្ជាក់ថា សង្គម​មួយ​ដែល​មាន​ការ​រីក​ចម្រើន​​តជំនាន់ ត្រូវការជាចាំបាច់នូវការអប់រំ និងការបណ្តុះផ្នត់គំនិតដល់ប្រជាជនវ័យក្មេង ឱ្យ​ចេះ​រៀន​ឱ្យ​តម្លៃ ទទួលស្គាល់ គោរព ស្ញប់ស្ញែង និងមានកតញ្ញូតាធម៌​ចំពោះ​ការ​លះបង់រ​បស់​អ្នក​ជំនាន់​មុន​។ ឯកឧត្តមបានបន្តថា បទពិសោធ និងពុទ្ធិរបស់ថ្នាក់ដឹកនាំគឺជា «មេរៀន» ដែល​គ្មាន​សាលា ​អាចបង្រៀនបានពេញលេញនោះទេ លុះត្រាតែយើងទទួលបានឱកាស ដើម្បីស្តាប់ និង​រៀន​សូត្រ​ផ្ទាល់ពី «សាក្សីរស់» នៃប្រវត្តិសាស្ត្រ។

ឯកឧត្តមបានបន្ថែមថា យើងត្រូ​វ​ការ​ជា​ចាំបាច់​នូវការ​ចូលរួម​ដោយ​សកម្ម​ពី​ប្រជាជន​វ័យ​ក្មេង​របស់​យើង ​ក្នុងការយកចិត្តទុកដាក់ពីសុខទុក្ខរបស់ប្រទេសជាតិ។ ឈរលើស្មារតីនេះ អនុលោម​តាម​ទស្សនៈ​ដឹក​នាំដ៏ខ្ពង់ខ្ពស់របស់ សម្តេចតេជោ ដែលបានគូសបញ្ជាក់ថា «ក្មេងមានកម្លាំង ស្គាល់ផ្លូវ ចាស់​មានបទពិសោធ» គណៈចលនាមហាជននៃគណៈកម្មាធិការ កណ្តាល ក្រោម​ការ​តម្រង់​ទិសរបស់​សម្តេចកិត្តិសង្គហបណ្ឌិត បានផ្តួចផ្តើមរៀបចំវេទិកាបាឋកថាជាស៊េរី«កេរដំណែលរស់៖ គុណ​តម្លៃ ៧មករា» ដើម្បីផ្សារភ្ជាប់នូវគុណតម្លៃអន្តរជំនាន់ តាមរយៈការចែករំលែកចំណេះដឹង និង​បទពិសោធពីការអនុវត្តផ្ទាល់ ឆ្លងកាត់ផ្ទាល់របស់ថ្នាក់ដឹកនាំជំនាន់មុន ទៅកាន់​អ្នក​ជំនាន់​ក្រោយ​ ដែលជាកម្លាំងបន្តវេនដឹកនាំ៕