រដ្ឋមន្ត្រីក្រសួងបរិស្ថាន ធ្វើបទបង្ហាញជូនឧត្តមក្រុមប្រឹក្សាអំពីវឌ្ឍនភាពនៃអភិបាលកិច្ចចំពោះបរិបទបរិស្ថាននៅកម្ពុជា

ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថានដឹកនាំគណៈប្រតិភូធ្វើបទបង្ហាញ និងពិភាក្សាក្នុងក្របខ័ណ្ឌឧត្តមក្រុមប្រឹក្សាពិគ្រោះ និងផ្តល់យោបល់ អំពីវឌ្ឍនភាពនៃអភិបាលកិច្ច ព្រមទាំងបញ្ហាប្រឈមមួយចំនួននៃការលើកស្ទួយប្រសិទ្ធភាពការងារ និងការអនុវត្តន៍ច្បាប់ស្ថិតក្នុងក្របខ័ណ្ឌសមត្ថកិច្ច របស់ក្រសួងបរិស្ថាន នៅវិមានសន្តិភាព នាព្រឹកថ្ងៃទី២០ ខែតុលា ឆ្នាំ២០២៦។

ឯកឧត្តម សែម សម្បត្តិ ប្រធានគណបក្សមហានគរបានថ្លែងថា កិច្ចប្រជុំឧត្តមក្រុមប្រឹក្សាពិគ្រោះ និងផ្តល់យោបល់បានអញ្ជើញរដ្ឋមន្ត្រីក្រសួងបរិស្ថានដើម្បីធ្វើបទបង្ហាញអំពីវឌ្ឍនភាពជុំវិញការងារក្រសួងបរិស្ថាន និងស្តីអំពីបរិស្ថានស្អាតនៅកម្ពុជា ដើម្បីពិភាក្សានិងកែលំអរឥទ្ធិពលអាក្រក់មួយចំនួនដែលបានសាយភាយ និងប៉ះពាល់ដល់បរិស្ថាន។ ទាក់ទងកត្តាបរិស្ថានពីមួយឆ្នាំទៅមួយឆ្នាំការប្រឈមផលប៉ះពាល់ទៅលើបរិស្ថានអំពីបម្រែបម្រួលអាកាសធាតុផែនដី គឺលែងក្លាយទៅជាគ្រោះមហន្តរាយទៀតហើយ គឺបានក្លាយទៅជាបញ្ហាប្រឈមដោយផ្ទាល់សម្រាប់ជីវភាពរបស់ប្រជាជនទូទៅនៅក្នុងសហគមន៍ទាំងមូល។

ឯកឧត្តម គង្គ់ ប៊ុនធឿន ប្រធានគណបក្សចលនាប្រជាធិបតេយ្យបានថ្លែងថា ឧត្តមក្រុមប្រឹក្សាពិគ្រោះ និងផ្តល់យោបល់អញ្ជើញរដ្ឋមន្ត្រីក្រសួងបរិស្ថានមកធ្វើបង្ហាញនេះ គឺពិតជាមានសារៈសំខាន់ណាស់ ពីព្រោះពាក់ព័ន្ធបរិស្ថានមើលឃើញថា នៅក្នុងប្រទេសកំពុងមានការអភិវឌ្ឍន៍ ហើយបញ្ហាបរិស្ថានជាកត្តាចម្បងសម្រាប់សុខមាលភាពរបស់ប្រជាពលរដ្ឋ។ ការធ្វើបទបង្ហាញរបស់រដ្ឋមន្ត្រីក្រសួងបរិស្ថានជូនឧត្តមក្រុមប្រឹក្សាពិគ្រោះ និងផ្តល់យោបល់ គឺដើម្បីឲ្យបានយល់កាន់តែច្បាស់អំពីបញ្ហាបរិស្ថាននិងបញ្ហាប្រឈមនានា។

ឧត្តមក្រុមប្រឹក្សាពិគ្រោះ និងផ្តល់យោបល់ បានបញ្ជាក់ថា កិច្ចពិគ្រោះយោបល់ផ្តល់ធាតុចូលលើបរិបទជាក់ស្តែងនានា ក្នុងក្របខ័ណ្ឌសមត្ថកិច្ចរបស់ក្រសួងបរិស្ថាន ជាពិសេសពាក់ព័ន្ធជាក់ស្តែងអំពីវឌ្ឍនភាពនៃអភិបាលកិច្ចចំពោះបរិបទបរិស្ថាននៅកម្ពុជា ដែលលើកឡើងដោយប្រតិភូគណបក្សនីមួយៗ នៃឧត្តមក្រុមប្រឹក្សាពិគ្រោះ និងផ្តល់យោបល់ និងបកស្រាយពន្យល់ដោយរដ្ឋមន្ត្រីក្រសួងបរិស្ថាន៕ អត្ថបទ៖ វង្ស សុភាព