មន្រ្ដីជំនាញ៖ ការនាំចូលទំនិញរបស់ថៃមកកម្ពុជាបន្តធ្លាក់ចុះ ដោយសារការពហិការរបស់ពលរដ្ឋ

ឯកឧត្តមបណ្ឌិត គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានលើកឡើងថា គិតមកដល់ពេលនេះ ការនាំចូលមុខទំនិញរបស់ថៃមកកម្ពុជាបន្តធ្លាក់ចុះ ដោយសារចលនានៃការពហិការរបស់ប្រជាពលរដ្ឋ និងខណៈសន្ទុះនៃការផលិតផលិតកម្មក្នុងស្រុកដើម្បីផ្គត់ផ្គង់តម្រូវការទីផ្សារមានការកើនឡើង។

នៅក្នុងវេទិកាផ្សព្វផ្សាយ និងដាក់ឲ្យអនុវត្ដផែនការសកម្មភាព ឆ្នាំ២០២៦ កាលពីថ្ងៃទី២៧ ខែមករាកន្លងទៅ ឯកឧត្តមបណ្ឌិត គុណ ញឹម បានមានប្រសាសន៍បញ្ជាក់ថា ទំនិញគ្រឿងឧបភោគ បរិភោគ ដែលនាំចូលពីថៃ នឹងបន្ដធ្លាក់ចុះទៀត។ ជាកាពិត អាជីវករ ពាណិជ្ជករ បានរកប្រភពផ្គត់ផ្គង់ពីកន្លែងផ្សេងដើម្បីជំនួសផលិតផលថៃ។

ឯកឧត្តមបណ្ឌិត ជឿជាក់ថា សន្ទុះនៃចលនាផលិតផលិតកម្មនៅក្នុងស្រុក ដើម្បីផ្គត់ផ្គង់តម្រូវការទីផ្សារ គឺមានការកើនឡើងច្រើនឡើងៗ ហើយទទួលបានការគាំទ្រពីរាជរដ្ឋាភិបាល។ ឯកឧត្តម បានបន្តថា ទំនិញដែលធ្លាប់នាំចូលពីប្រទេសថៃ ដើម្បីមកផ្គត់ផ្គង់នៅក្នុងទីផ្សារ នឹងមានការធ្លាក់ចុះកាន់តែតិចទៅៗ ដែលអាចដល់ដំណាក់កាលមួយ ធ្លាក់ដល់ចំណុចសូន្យ ដូចទៅនឹងមុខទំនិញ ដែលរាជរដ្ឋាភិបាលហាមឃាត់ផងដែរ មានដូចជា៖ បន្លែ ផ្លែឈើ ប្រេងឥន្ធនៈ និងឧស្ម័នឥន្ធនៈ។

សូមជម្រាបជូនថា វេទិកាផ្សព្វផ្សាយ និងដាក់ឱ្យអនុវត្តផែនការសកម្មភាពឆ្នាំ២០២៦ របស់អគ្គនាយកដ្ឋានគយ និងរដ្ឋាករកម្ពុជា បានប្រព្រឹត្តទៅដោយមានការធ្វើបទបង្ហាញរបស់តំណាងនៃអគ្គនាយកដ្ឋានគយនិងរដ្ឋាករកម្ពុជា លើប្រធានបទចំនួន៤ គឺ “សកម្មភាពគន្លឹះផែនការសកម្មភាពឆ្នាំ២០២៦ របស់ អគ្គនាយកដ្ឋានគយនិងរដ្ឋាករកម្ពុជា”, “ការកែទម្រង់ច្បាប់ និងបទប្បញ្ញត្តិ”, “គោលនយោបាយពន្ធនិងអាករ និងកិច្ចសម្រួលពាណិជ្ជកម្ម”, និង “ការប្រើប្រាស់ប្រព័ន្ធបច្ចេកវិទ្យាព័ត៌មាននៅក្នុងកិច្ចប្រតិបត្តិការគយ” ។ វេទិកានេះ មានការចូលរួមពីតំណាងសមាគមធុរជន, អ្នកនាំចេញ-នាំចូល, ជើងសាគយ, អ្នកជំនាញការ, មន្ត្រីនៃក្រសួងសេដ្ឋកិច្ចនិងហិរញ្ញវត្ថុ និងមន្ត្រីគយនិងរដ្ឋាករជាច្រើនរូបទៀត។

គួរបញ្ជាក់ទៀតថា អគ្គនាយកដ្ឋានគយ និងរដ្ឋាករកម្ពុជា តែងរៀបចំផែនការសកម្មភាពការងារជារៀងរាល់ឆ្នាំហើយក្នុងផែនការសកម្មភាពឆ្មាំ២០២៦នេះ មានបែងចែកជា ៣ផ្នែកសំខាន់ៗ គឺ ១) ការពង្រឹងគោលនយោបាយពន្ធអាករ និងការងារបច្ចេកទេសគយ, ២) កិច្ចសម្រួលពាណិជ្ជកម្ម, អនុលោមភាពនិងការអនុវត្តច្បាប់, និងការធ្វើទំនើបកម្មប្រព័ន្ធបច្ចេកវិទ្យាព័ត៌មាន, និង ៣) ការពង្រឹងសមត្ថភាពស្ថាប័នគយ។ ក្នុងនោះ ការជំរុញកែលម្អកិច្ចសម្រួលពាណិជ្ជកម្ម និងការពង្រីកនិងពង្រឹងការប្រើប្រាស់ប្រព័ន្ធបច្ចេកវិទ្យាព័ត៌មាន ត្រូវបានចាត់ទុកជាអាទិភាពចម្បងរបស់អគ្គនាយកដ្ឋានគយនិងរដ្ឋាករកម្ពុជា៕ អត្ថបទ៖ ឈិត បូរ៉ាវី