រយៈពេល២ថ្ងៃភ្ញៀវទេសចរជាតិ និងអន្ដរជាតិជាង៥ម៉ឺន៦ពាន់នាក់ទស្សនាប្រាសាទអង្គរ ក្នុងពិធីចូលឆ្នាំថ្មី

មន្ដ្រីជំនាញអាជ្ញាធរជាតិអប្សរា បានឱ្យដឹងថា ភ្ញៀវទេសចរជាតិ និងអន្ដរជាតិ ជាង៥ម៉ឺន៦ពាន់នាក់ បានដើរទស្សនាប្រាសាទអង្គរវត្ដ ក្នុងរយៈពេល២ថ្ងៃ នៃពិធីចូលឆ្នាំថ្មីប្រពៃណីជាតិខ្មែរ ដែលចាប់ពីថ្ងៃទី១៤ដល់ថ្ងៃទី១៥ខែមេសាឆ្នាំ២០២៦នេះ។

អ្នកទេសចរជាតិ មកពីរាជធានីខេត្ដ នៅថ្ងៃទី១៦ខែមេសាឆ្នាំ២០២៦នេះ បានបង្ហាញអារម្មណ៍សប្បាយរីករាយយ៉ាងខ្លាំង ដែលបានបន្ដមកទស្សនាទិដ្ឋភាពដ៏ស្រស់ស្អាត នៃប្រាសាទអង្គរវត្ត នៅក្នុងពិធីបុណ្យចូលឆ្នាំថ្មីនេះ ខណៈដែល ពួកគាត់បានឃើញភ្ញៀវទេសចរជាតិ និងអន្តរជាតិយ៉ាងច្រើនកុះករ ដែលធ្វើឱ្យកំណើនសេដ្ឋកិចដល់ប្រជាពលរដ្ឋនៅមូលដ្ឋាន។

ពួកគាត់សម្ដែងមោទនភាពចំពោះរមណីយដ្ឋានប្រវត្ដិសាស្ដ្រមួយនេះ ដែលស្ថាប័នពាក់ព័ន្ធ បានអភិវឌ្ឍន៍ឱ្យមានការរីកចំរើនជាបន្ដបន្ទាប់ ដែលធ្វើឱ្យទាក់ទាញអ្នកទេសចរគ្រប់ជាតិសាសន៍ ទស្សនាប្រកបដោយសុខសុវត្ថិភាព ។

ពួកគាត់បន្តថា ទោះបីជាធ្លាប់បានមកទស្សនាប្រាសាទអង្គរវត្តជាច្រើនលើកក៏ដោយ ប៉ុន្ដែពេលបានឃើញពីភាពអស្ចារ្យនៃប្រាសាទអង្គរ មានរម្មណ៍ស្រស់ថ្លា ជាពិសេស បានឃើញកំពូលប្រាសាទអង្គរ អមជាមួយស្រះទឹក ខណៈដែលការអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងអភិរក្សប្រាសាទបុរាណកាន់តែមានភាពល្អប្រសើរពីមួយឆ្នាំទៅមួយឆ្នាំ។

បើតាមរបាយការណ៍របស់ លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ របស់អាជ្ញាធរជាតិអប្សរា បានបង្ហាញថា ក្នុងឱកាសពិធីបុណ្យឆ្នាំថ្មី នៅថ្ងៃទី១៤ខែមេសាឆ្នាំ២០២៦ មានភ្ញៀវទេសចរជាតិនិងអន្ដរជាតិចូលទស្សនាតំបន់អង្គរ មានចំនួនប្រមាណជាង២ម៉ឺន២០០០នាក់ ក្នុងនោះភ្ញៀវបរទេសចំនួន២០៩១នាក់ និងនៅថ្ងៃទី១៥ខែមេសាឆ្នាំ២០២៦នេះ មានអ្នកទេសចរជាច្រើនជាតិសាសន៍ ប្រមាណជាង៣ម៉ឺន២ពាន់នាក់ បានទៅបន្ដទៅទស្សនាប្រាសាទអង្គរ ក្នុងនោះអ្នកទេសចរអន្ដរជាតិមានចំនួន ៣៨៥៧នាក់ ដែលសរុបរយៈពេលពីថ្ងៃនេះ មានអ្នកទេសចរជាតិនិងអន្ដរជាតិជាង៥ម៉ឺន៦ពាន់នាក់៕