អ្នកនាំពាក្យ៖ ការប្រារព្ធពិធីចូលឆ្នាំថ្មីមិនត្រឹមតែជាការថែរក្សាទំនៀមទម្លាប់ប្រពៃណី និងវប្បធម៌ពីដូនតាប៉ុណ្ណោះទេ ប៉ុន្ដែបានរួមចំណែកដល់ចរន្តសេដ្ឋកិច្ចជាតិថែមទៀត

ភ្នំពេញ៖ អ្នកនាំពាក្យរាជរដ្ឋាភិបាល ឯកឧត្តម ប៉ែន បូណា បានថ្លែងតាមរយៈសន្និសីទសារព័ត៌មាន នៅថ្ងៃទី១៨ ខែមេសា ឆ្នាំ២០២៦នេះថា ការប្រារព្ធពិធីបុណ្យចូលឆ្នាំថ្មីប្រពៃណីជាតិនាពេលនេះ មិនត្រឹមតែជាការថែរក្សាទំនៀមទម្លាប់ប្រពៃណីនិងវប្បធម៌ពីដូនតាប៉ុណ្ណោះទេ ប៉ុន្តែ កម្មវិធីនេះក៏រួមចំណែកធ្វើឱ្យចរន្តសេដ្ឋកិច្ចដើរតាមរយៈចលនាទេសចរក្នុងស្រុកនិងបរទេសយ៉ាងច្រើនកុះករនៅទូទាំងប្រទេស។

អ្នកនាំពាក្យរាជរដ្ឋាភិបាលបានបញ្ជាក់ថា រាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត តែងតែគិតគូរផលប្រយោជន៍ជាតិ និងប្រជាពលរដ្ឋគ្រប់មជ្ឈដ្ឋាន និងគ្រប់ជ្រុងជ្រោយ។ ជាក់ស្តែង ការប្រារព្ធពិធីបុណ្យចូលឆ្នាំថ្មីប្រពៃណីជាតិនាពេលនេះ មិនត្រឹមតែជាការថែរក្សាទំនៀមទម្លាប់ប្រពៃណីនិងវប្បធម៌ពីដូនតាប៉ុណ្ណោះទេ ប៉ុន្តែកម្មវិធីនេះក៏រួមចំណែកធ្វើឱ្យចរន្តសេដ្ឋកិច្ចដើរតាមរយៈចលនាទេសចរក្នុងស្រុកនិងបរទេសយ៉ាងច្រើនកុះករនៅទូទាំងប្រទេស។ លើសពីនេះ ដំណើរកម្សាន្តសប្បាយដោយទឹកមុខញញឹមរាក់ទាក់របស់ប្រជាពលរដ្ឋខ្មែរក៏បង្កើតបានជាចលនាមហាសាមគ្គីជាតិដ៏ទូលំទូលាយមួយដែលប្រទេសជាតិកំពុងត្រូវការជាចាំបាច់។

អ្នកនាំពាក្យបញ្ជាក់ថា ដើម្បីជួយសម្រួលដល់ជីវភាពប្រជាពលរដ្ឋនិងកម្មករ កម្មការិនី រាជរដ្ឋាភិបាល តាមរយៈសាលារាជធានីភ្នំពេញបានបញ្ចេញរថយន្តក្រុងសាធារណៈ ៦០០ គ្រឿងដើម្បីដឹកជញ្ជូនដោយឥតគិតថ្លៃ ពីរាជធានីភ្នំពេញទៅកាន់បណ្តាខេត្ត ទាំងទៅទាំងមក ក៏ដូចជាការដឹកជញ្ជូនក្នុងរាជធានីភ្នំពេញ ក្នុងនោះមានប្រជាពលរដ្ឋជាង១០ម៉ឺននាក់បានប្រើប្រាស់សេវានេះ។

ទន្ទឹមនឹងនោះ រាជរដ្ឋាភិបាលក៏បានចាត់វិធានការអន្តរាគមន៍នានាជាច្រើនដើម្បីជួយទប់តម្លៃប្រេងឥន្ធនៈ ដោយរដ្ឋជួយចេញខាតមួយផ្នែក និងបញ្ចុះពន្ធ អាករនានា មួយផ្នែកទៀត ដែលធ្វើឱ្យតម្លៃប្រេងសាំងនិងប្រេងម៉ាស៊ូតចុះទាបជាបន្តបន្ទាប់ក្នុងអំឡុងពេលបុណ្យចូលឆ្នាំថ្មី។

អ្នកនាំពាក្យបញ្ជាក់ថា និយាយជារួម ការការពារបូរណភាពទឹកដី និងការគិតគូរដល់សុខទុក្ខរបស់វីរយុទ្ធជនជួរមុខ ពលរដ្ឋភៀសសឹក មន្ត្រីរាជការ កងកម្លាំងគ្រប់ប្រភេទ ក៏ដូចជាប្រជាពលរដ្ឋគ្រប់មជ្ឈដ្ឋាន គឺជាអាទិភាពចម្បង និងជាក្តីកង្វល់របស់រាជរដ្ឋាភិបាល និងថ្នាក់ដឹកនាំនៃយើង ដែលមិនបានមើលរំលងចំណុចណាមួយឡើយ។ ការយកចិត្តទុកដាក់នេះ បានទទួលការឆ្លើយតបវិយ៉ាងស័ក្តិសមបំផុតពីប្រជាពលរដ្ឋ និងបង្កើតបានជាខ្សែចំណងមិនអាចកាត់ផ្តាច់បានរវាងរាជរដ្ឋាភិបាល ថ្នាក់ដឹកនាំ និងប្រជាពលរដ្ឋ៕