អាវុធហត្ថលើផ្ទៃប្រទេសប្រជុំផ្សព្វផ្សាយផែនការការពារសន្តិសុខជូនរដ្ឋមន្ត្រីក្រសួងការបរទេស និងរដ្ឋមន្ត្រីការពារជាតិចិន មកបំពេញទស្សនកិច្ចនៅកម្ពុជា

ភ្នំពេញ ៖ នៅព្រឹកថ្ងៃសុក្រទី២០ ខែមេសា ឆ្នាំ២០២៦ ដោយអនុវត្តន៍បទបញ្ជារបស់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស នៅបន្ទប់ប្រជុំអគារសេនាធិការដ្ឋានកងរាជអាវុធហត្ថលើផ្ទៃប្រទេស លោកឧត្តមសេនីយ៍ទោ ស សំបូរធន មេបញ្ជាការរង និងជានាយសេនាធិការកងរាជអាវុធហត្ថលើផ្ទៃប្រទេស ទទួលផែនការងារប្រតិបត្តិការ និងផែនការងារហ្វឹកហ្វឺន បានអញ្ជើញដឹកនាំអង្គប្រជុំដើម្បីផ្សព្វផ្សាយ ៖

១. ផែនការការពារសន្តិសុខ រក្សាសណ្តាប់ធ្នាប់ និងសង្គ្រោះបន្ទាន់ ពិធីបុណ្យវិសាខបូជា ដែលនឹងត្រូវប្រារព្ធធ្វើឡើងនៅថ្ងៃសុក្រ ១៥កើត និងថ្ងៃសៅរ៏ ១រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១-២ ខែឧសភា ឆ្នាំ២០២៦ នៅឧបដ្ឋានសាលា ខាងកើតព្រះសក្យមុនីចេតិយ ភ្នំព្រះរាជទ្រព្យ(ឧត្តុង្គ) ស្រុកពញាឮ ខេត្តកណ្តាល។

២. ផែនការ ការពារសន្តិសុខ រក្សាសុវត្ថិភាព និងសង្គ្រោះបន្ទាន់ ជូនឯកឧត្តម វ៉ាង យី រដ្ឋមន្ត្រីក្រសួងការបរទេស និងឯកឧត្តម តុង ជុន រដ្ឋមន្ត្រីក្រសួងការពារជាតិ នៃសាធារណរដ្ឋប្រជាមានិតចិន ដែលនឹងត្រូវអញ្ជើញមកបំពេញទស្សនកិច្ចការងារនៅព្រះរាជាណាចក្រកម្ពុជាកម្ពុជា នាពេលខាងមុខនេះ។

៣. ក្រៅពីនេះលោកឧត្តមសេនីយ៍ទោ មេបញ្ជាការរង និងជានាយសេនាធិការកងរាជអាវុធហត្ថលើផ្ទៃប្រទេស ក៏បានរំលឹកទៅដល់ការងារត្រៀមរៀបចំពិធីបើកវគ្គបណ្តុះបណ្តាលពលទាហាននៃកងរាជអាវុធហត្ថជំនាន់ទី៤៨ នៅវិទ្យាស្ថានកងរាជអាវុធហត្ថកំបូល និងការត្រៀមបើកវគ្គបំប៉នការប្រើប្រាស់សញ្ញាសម្គាល់យោធា។

កិច្ចប្រជុំផ្សព្វផ្សាយផែនការនេះមានការអញ្ជើញចូលរួមពីសំណាក់នាយសេនាធិការរង ស្នងការ ស្នងការរង មេបញ្ជាការគ្រប់អង្គភាពចំណុះអ.ហ.ផ.ទ និងបានភ្ជាប់វីដេអូ Conference ទៅសាលាកងរាជអាវុធហត្ថទាំង២(វិទ្យាស្ថានកងរាជអាវុធហត្ថ និងមជ្ឈមណ្ឌលហ្វឹកហ្វឺននាយទាហានរងកងរាជអាវុធហត្ថភ្នំជុំសែនរីករាយ) និងបញ្ជាការដ្ឋានកងរាជអាវុធហត្ថរាជធានី-ខេត្តទាំង២៥។