ព័ត៌មាន

អាណិកជនខ្មែរ និងទេសចរអន្តរជាតិចាប់ផ្តើមចាកចេញពីកម្ពុជាក្រោយចប់ចូលឆ្នាំខ្មែរ

អាណិកជនខ្មែរ និងភ្ញៀវទេសចរអន្តរជាតិនានា បាននាំគ្នាអញ្ជើញដំណើរទៅប្រទេសគេវិញជាបណ្តើរៗ ក្រោយពីបានអញ្ជើញមកដើរកម្សាន្តសប្បាយទស្សនាកម្ពុជា នៅក្នុងអំឡុងពេលបុណ្យចូលឆ្នាំថ្មី ប្រពៃណីខ្មែរ ដែលទើបនឹងចប់នៅក្នុងសប្តាហ៍មុននេះ។

ភ្ញៀវទេសចរអន្តរជាតិ និងអាណិកជនខ្មែរនៅប្រទេស បានថ្លែងប្រាប់BTV នៅថ្ងៃទី២០ ខែមេសាថា ការដើរកម្សាន្តមកកម្ពុជា នៅក្នុងអំឡុងថ្ងៃបុណ្យចូលឆ្នាំថ្មី ប្រពៃណីខ្មែរ នៅក្នុងសប្តាហ៍មុននេះ សំគាល់ឃើញថា គ្រប់គោលដៅទេសចរណ៍នានា និងនៅតាមជនបទស្រុកស្រែដាច់ស្រយ៉ាលនានា គឺសុទ្ធតែមានតុបតែង ធ្វើបុណ្យទានអបអរសាទរពិធីបុណ្យចូលឆ្នាំខ្មែរ និងមានការបង្កើតកម្មវិធីសាសនា កម្មវិធីលេងល្បែងកម្សាន្តប្រជាប្រីយ៍ជាច្រើន មានភាពសប្បាយរីករាយខ្លាំង ហើយបទពិសោធន៍ការដើរកម្សាន្តនេះ ធ្វើឲ្យគេទទួលបានអនុស្សាវរីយ៍ ចង់ចាំមិនអាចបំភ្លេចបាន ហើយនៅក្នុងឱកាសបុណ្យចូលឆ្នាំខ្មែរ ឆ្នាំខ្មែរក្រោយៗទៀត គឺគេមកទស្សនាកម្ពុជាម្តងទៀត។

យ៉ាងណាតាមការឲ្យដឹងពីនគរបាលអន្តោប្រវេសន៍ បានឲ្យដឹងថា ក្នុងអំឡុងខែមេសា ដែលមានការរៀបចំពិធីបុណ្យចូលឆ្នាំថ្មី ប្រពៃណីខ្មែរ ឆ្នាំ២០២៦ ពីមួយសប្តាហ៍ទៅមួយសប្តាហ៍ គឺមានអ្នកដំណើរអន្តរជាតិ ធ្វើដំណើរឆ្លងកាត់ចេញចូលអាកាសយានអន្តរជាតិតេជោ TIA ប្រមាណ៨៥០០០នាក់ ដែលមាន១៥១សញ្ជាតិ ភាគច្រើនជាអាណិកជនខ្មែរកាន់លិខិតឆ្លងដែនបរទេស មកពីអាម៉េរិក អូស្ត្រាលី បារាំង អង់គ្លេស ចិន និងតៃវ៉ាន់ ជាដើម៕ អត្ថបទ៖ ស៊ុម សុខជា