ក្រសួងបរិស្ថានកំពុងពិនិត្យសំណាកទឹករកមូលហេតុត្រីងាប់នៅព្រែកត្រែង ក្នុងខេត្តបាត់ដំបង

បន្ទាប់ពីទទួលបានព័ត៌មានថា ត្រីពុលងាប់នៅក្នុងព្រែកត្រែងក្នុងខេត្តបាត់ដំបង មន្រ្តី​ជំនាញ​នៃ​ក្រសួង​បរិស្ថានបានចុះពិនិត្យ ស្រាវជ្រាវ និងយកសំណាកទឹកមកពិនិត្យនៅក្រសួងបរិស្ថាន ដើម្បី​រក​មូល​ហេតុបណ្តាលឱ្យត្រីងាប់នៅក្នុងព្រែកនេះ។

ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន នៅព្រឹកថ្ងៃទី២១ខែមេសានេះ បាន​ប្រាប់ BTV មន្រ្តី​ជំនាញ​ នៃមន្ទីរបរិស្ថានខេត្តបាត់ដំបង កាលពីថ្ងៃទី១៩ ខែមេសា ឆ្នាំ២០២៦ បាន​សហការ​ជា​មួយ ​អាជ្ញាធរមូលដ្ឋាន បានចុះស្រាវជ្រាវ ត្រួតពិនិត្យ និងចាត់វិធានការ ដើម្បី​ទប់​ស្កាត់​ការ​បំពុល​ទឹក​ព្រែក​ត្រែង ក្នុងភូមិស្វាយស ឃុំត្រែង ស្រុករតនៈមណ្ឌល ខេត្តបាត់ដំបង បន្ទាប់​ពី​មាន​សេចក្តី​រាយ​ការណ៍ពីអ្នកសារព័ត៌មានថា មានករណីត្រីពុល និងងាប់នៅព្រែកត្រែង។ ក្រុម​ការ​ងារ​ជំនាញ​បានចុះពិនិត្យដល់ទីតាំងពិនិត្យប្រព័ន្ធបង្ហូរទឹកកខ្វក់ រកប្រភពបញ្ចេញសំណល់រាវ កន្លែង​សង្ស័យ ​ដែលអាចធ្វើឱ្យប៉ះពាល់គុណភាពទឹក និងមានត្រីពុលងាប់ក្នុងព្រែកត្រែងនេះ។

បន្ទាប់​មកនៅថ្ងៃទី២០ ខែមេសា ឆ្នាំ២០២៦ ក្រុមការងារ​បន្ត​ចុះ​ពិនិត្យ​ស្រាវ​ជ្រាវ និង​បាន​រក​ឃើញ​សំណាក​ត្រីងាប់មួយចំនួន។ យោងតាមការចុះទៅពិនិត្យដល់ទីតាំងជាក់ស្ដែង កន្លែង​មាន​ត្រី​ងាប់ ​និងទឹកមានធំក្លិនស្អុយ ក្នុងព្រែកត្រែង ដែលស្ថិតនៅចម្ងាយ 600 ម៉ែត្រ ផ្នែក​ខាង​ក្រោម​រោង​ចក្រ​កែ​ច្នៃ​ស្វាយ​ចំនួនពីរ។

ឯកឧត្តមបន្តទៀតថា ក្រុមការងារបានចុះពិនិត្យជាក់ស្តែង មិនបានឃើញ​មាន​ករណី​សង្ស័យ​ពី​ការ​លេច​ធ្លាយ ​ឬការបញ្ចេញសំណល់រាវចូលទៅក្នុងអូត្រែងនៅឡើយទេ ដោយសារក្រុមហ៊ុនទាំង២ បាន​រៀប​ចំ​ឱ្យមានអាងប្រព្រឹត្តិកម្មទឹកតាមលក្ខណៈបច្ចេកទេស និងនៅ​តំបន់​រោង​ចក្រ​ទឹក​ដែល​បាន​បញ្ចេញ​មកក្រៅមានពណ៌ថ្លា និងក៏មិនមានក្លិនស្អុយដែរ។ ទន្ទឹមនឹងនេះ ក្រុម​ការ​ងារ​បាន​យក​សំណាក​ទឹកចំនួន៥ទីតាំង នៅខ្សែទឹកខាងលើ និងខាងក្រោម និងចំណុច​ទឹក​ស្រះ​របស់​រោង​ចក្រ ​នៃក្រុមហ៊ុនកែច្នៃដំណាប់ស្វាយទាំងពីរ២កន្លែង គឺក្រុមហ៊ុនយូយូរភីន និង​ក្រុម​ហ៊ុន​ប៉ៃស៊ិន​សេង​ ដែលស្ថិត​ក្នុង​ភូមិសាស្រ្ត​ក្បែរ​កន្លែង​សង្ស័យ​ដើម្បី​បញ្ជូន​មក​មន្ទី​រ​ពិ​សោធន៍​រប​ស់​ក្រសួ​ង​បរិស្ថាន​។ តាមការគ្រោងទុកលទ្ធផលនឹងនឹងដឹងក្នុងរយៈពីរ ឬបីទៀត។

គួរបញ្ជាក់ដែរថា ក្រសួងបរិស្ថានបានដាក់ចេញចំណាត់ការផ្លូវច្បាប់យ៉ាងម៉ឺងម៉ាត់ មិន​លើក​លែង​ចំពោះ​ក្រុម​ហ៊ុន ឧស្សាហកម្ម ឬរោងចក្រណា ដែលបង្កការបំពុលទឹកសាធារណៈឡើយ៕ អត្ថបទ៖ទូច សោភ័ណ