ប្រធានអាស៊ាន ប្តេជ្ញាចិត្ត សម្របសម្រួលក្រុម AOT តាមដានពិនិត្យស្ថានការណ៍ ព្រំដែនកម្ពុជា-ថៃ

លោកជំទាវរដ្ឋមន្ត្រី Lazaro ប្រធានអាស៊ាន បានបញ្ជាក់ជាថ្មី អំពីការប្តេជ្ញាចិត្តចំពោះតួនាទីរបស់ហ្វីលីពីនជាអ្នកដឹកនាំ ការសម្របសម្រួលក្រុមអ្នកសង្កេតការណ៍អាស៊ាន (AOT) ក្នុងការតាមដានពិនិត្យស្ថានការណ៍នៅតាមបណ្តោយ ព្រំដែនកម្ពុជា-ថៃ។

នៅព្រឹកថ្ងៃទី៣០ ខែមេសា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និង សហប្រតិបត្តិការអន្តរជាតិកម្ពុជា បានជួបសន្ទនាតាមទូរស័ព្ទជាមួយ លោកជំទាវ Maria Theresa P. Lazaro រដ្ឋមន្ត្រី ការបរទេសនៃសាធារណរដ្ឋហ្វីលីពីន និងជាប្រធានអាស៊ាន។

លោកជំទាវរដ្ឋមន្ត្រី Lazaro បានបញ្ជាក់ជាថ្មី អំពីការប្តេជ្ញាចិត្តចំពោះតួនាទីរបស់ហ្វីលីពីនជាអ្នកដឹកនាំ ការសម្របសម្រួលក្រុមអ្នកសង្កេតការណ៍អាស៊ាន (AOT) ក្នុងការតាមដានពិនិត្យស្ថានការណ៍នៅតាមបណ្តោយ ព្រំដែនកម្ពុជា-ថៃ។ លោកជំទាវក៏បានផ្តល់កិច្ចសម្របសម្រួលរបស់ហ្វីលីពីនក្នុងនាមជាប្រធានអាស៊ាន ដើម្បីផ្តល់ ជាវេទិកាស្ថាបនាសម្រាប់ប្រទេសសមាជិកអាស៊ានក្នុងការស្វែងរកដំណោះស្រាយមួយយូរអង្វែង និងប្រកបដោយ សន្តិវិធីសម្រាប់បញ្ហាដែលកំពុងកើតមានឡើង។

ឯកឧត្តមឧបនាយករដ្ឋមន្ត្រី ប្រាក់ សុខុន បានវាយតម្លៃខ្ពស់ចំពោះតួនាទីរបស់ប្រទេសហ្វីលីពីន ក្នុងនាម ជាប្រធានអាស៊ានបច្ចុប្បន្ន ក្នុងការសម្របសម្រួលដល់ការសន្ទនាក្នុងចំណោមប្រទេសសមាជិកអាស៊ាន ដើម្បី ស្វែងរកដំណោះស្រាយ និងសន្តិភាពយូរអង្វែងចំពោះស្ថានភាពព្រំដែនបច្ចុប្បន្នរវាងកម្ពុជា និងថៃ។

រដ្ឋមន្ត្រីទាំងពីរបានផ្លាស់ប្តូរទស្សនៈលើការពង្រឹងឯកភាព មជ្ឈភាពរបស់អាស៊ាន និងការចូលរួមចំណែក ដល់សន្តិភាព និងស្ថិរភាពនៅក្នុងតំបន់។

រដ្ឋមន្ត្រីទាំងពីរក៏បានបញ្ជាក់ជាថ្មីនូវកិច្ចសហប្រតិបត្តិការទ្វេភាគីដ៏ជិតស្និទ្ធ និងស្មារតីសាមគ្គីភាពដ៏រឹងមាំ របស់ប្រទេសទាំងពីរ ក្នុងនាមជាសមាជិកគ្រួសារអាស៊ាន និងការប្តេជ្ញាចិត្តរួមគ្នាក្នុងការបន្តចូលរួមគាំទ្រដល់បុព្វហេតុ សន្តិភាព និងសន្តិសុខក្នុងតំបន់៕