គណៈកម្មាធិការអចិន្ត្រៃយ៍ព្រឹទ្ធសភាសម្រេចប្រគល់ភារកិច្ចជូនគណៈកម្មការទី៤ និងទី៦ ពិនិត្យសិក្សាលើសេចក្តីព្រាងច្បាប់ស្តីពីវិសោធនកម្មច្បាប់ ស្តីពីការគ្រប់គ្រងរដ្ឋបាលឃុំ សង្កាត់ និងទទួលយកសំណើរបស់គណបក្សប្រជាជនកម្ពុជា ដើម្បីប្រកាសទទួលស្គាល់សមាជិកព្រឹទ្ធសភាថ្មី

ភ្នំពេញ៖ នៅព្រឹកថ្ងៃអង្គារ ទី២៥ ខែសីហា ឆ្នាំ២០២៦ គណៈកម្មាធិការអចិន្ត្រៃយ៍ព្រឹទ្ធសភា បាន​បើក​កិច្ច​ប្រជុំក្រោមអធិបតីភាពដ៏ខ្ពង់ខ្ពស់របស់ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា ដើម្បី​ពិនិត្យ និងសម្រេចលើរបៀបវារៈសំខាន់ៗចំនួន៣ មានដូចខាងក្រោម៖

១. ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពី វិសោធន​កម្ម​ច្បាប់​ស្តីពីការគ្រប់គ្រងរដ្ឋបាលឃុំ សង្កាត់។

២. ពិនិត្យ និងសម្រេចលើសំណើរបស់គណបក្សប្រជាជនកម្ពុជា លេខ ០១០/០៨២៦/លគ.គក ចុះថ្ងៃទី២០ ខែសីហា ឆ្នាំ២០២៦។

៣. បញ្ហាផ្សេងៗ។

ក្រោយពីបានពិនិត្យ និងពិភាក្សាយ៉ាងល្អិតល្អន់ គណៈកម្មាធិការអចិន្ត្រៃយ៍ព្រឹទ្ធសភា បាន​សម្រេច​ប្រគល់ភារកិច្ចជូនគណៈកម្មការមហាផ្ទៃ ការពារជាតិ មុខងារសាធារណៈ និង​កិច្ច​ការ​ព្រំដែន​ នៃព្រឹទ្ធសភា (គណៈកម្មការទី៤) សហការជាមួយគណៈកម្មការនីតិកម្ម និងយុត្តិធម៌ នៃ​ព្រឹទ្ធសភា (គណៈកម្មការទី៦) ពិនិត្យសិក្សាលើសេចក្តីព្រាងច្បាប់ស្តីពីវិសោធនកម្មច្បាប់ ស្តីពី​ការគ្រប់គ្រងរដ្ឋបាលឃុំ សង្កាត់ ។

២-ទទួលយកសំណើរបស់គណបក្សប្រជាជនកម្ពុជា ដើម្បីប្រកាស​ទទួល​ស្គាល់​សមាជិក​ព្រឹទ្ធសភា​ថ្មី​៕