មន្ត្រីជាន់ខ្ពស់វប្បធម៌៖ «ការងារអធិការកិច្ចត្រូវបានចាត់ទុកជា «ឆ្អឹងខ្នង» និងជា «ឧបករណ៍​យុទ្ធសាស្ត្រ​»

ឯកឧត្តម បូ រុទី្ធ អនុរដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអៈអាងថា ក្នុងបរិបទ​នៃ​ការ​កែ​ទម្រង់​រដ្ឋបាល​សាធារណៈ និងការលើកកម្ពស់អភិបាលកិច្ចល្អ របស់រាជរដ្ឋាភិបាល នៃព្រះ​រា​ជា​ណា​ចក្រ​កម្ពុជា ការងារអធិការកិច្ចត្រូវបានចាត់ទុកជា «ឆ្អឹងខ្នង» និងជា «ឧបករណ៍យុទ្ធសាស្ត្រ» មិន​អាច​ខ្វះបា​ន។

ការថ្លែងរបស់ឯកឧត្តម បូ រុទី្ធ យ៉ាងដូច្នេះ ក្នុងពិធីបើកសិក្ខាសាលាស្តីពី «មូលដ្ឋានគ្រឹះ​អធិការ​កិច្ច​» នាទីសី្តការក្រសួង​វប្បធម៌ និងវិចិត្រសិល្បៈ ព្រឹកថ្ងៃទី២២ ខែតុលា ឆ្នាំ២០២៦នេះ។

ឯកឧត្តម បន្តថា ថ្នាក់ដឹកនាំរាជរដ្ឋាភិបាល ក៏ដូចជាថ្នាក់ដឹកនាំក្រសួងវប្បធម៌ និង​វិចិត្រ​សិល្បៈ​តែង​តែ​សង្កត់ធ្ងន់ថា «អធិការកិច្ច គឺ ជាភ្នែក ជាត្រចៀក (ឬភ្នែកច្រមុះ) របស់ថ្នាក់លើ និងជា​មិត្ត​ដ៏​ស្និទ្ធ​ស្នាល​របស់ថ្នាក់ក្រោម»។ មានន័យថា ការងារអធិការ​កិច្ច​មិន​មែន​ធ្វើ​ឡើង​ក្នុង​បំណង​ស្វែង​រ​ក​តែ​កំហុស ចាប់ទោសអូសដំណើរ ឬ បង្កើតការភ័យខ្លាចដល់អង្គភាពរងការអធិការកិច្ចនោះទេ ប៉ុន្តែ​ផ្ទុយ​ទៅវិញ គោលបំណងពិតប្រាកដ គឺដើម្បី «បង្ការ ទប់ស្កាត់ ណែនាំ តម្រង់ទិស និងកែ​លម្អ​»​។ វាជាកញ្ចក់ឆ្លុះបញ្ចាំងឱ្យឃើញពីចំណុចខ្លាំង ចំណុចខ្សោយ ភាពចន្លោះ ប្រហោង​នៃ​ច្បាប់ ​និងការអនុវត្តជាក់ស្តែង ដើម្បីយើងរួមគ្នាបំពេញបន្ថែមឱ្យទាន់ពេលវេលា សំដៅ​ធានា​ឱ្យ​បាន​នូវ​តម្លាភាព គណនេយ្យភាព និងប្រសិទ្ធភាពការងារខ្ពស់បំផុត។ ហេតុដូចនេះហើយ ការ​រៀប​ចំ​សិក្ខាសាលាស្តីពី «មូលដ្ឋានគ្រឹះអធិការកិច្ច» នៅថ្ងៃនេះ គឺពិតជាត្រូវ​ចំពេល​វេលា​និង​ឆ្លើយ​តប​ទៅ​នឹងតម្រូវការចាំបាច់របស់ស្ថាប័នយើង។

ឆ្លៀតក្នុងឱកាសនោះ ឯកឧត្តម បូ វុទី្ធ សូមដាក់ចេញនូវការណែនាំនិងផ្តាំផ្ញើចំនួន៤ ដូចខាងក្រោម៖ ទី១.ចំពោះសិក្ខាកាមទាំងអស់៖ ត្រូវយកចិត្តទុកដាក់ត្រងត្រាប់ស្តាប់ ក្រេបជញ្ជក់ចំណេះដឹង និងគោរពវិន័យឱ្យបានខ្ជាប់ខ្ជួន។ មូលដ្ឋានគ្រឹះនៃច្បាប់ និងនីតិវិធីអធិការកិច្ច គឺមានភាពម៉ត់ចត់ណាស់។ ទី២.ចំពោះលោកគ្រូឧទ្ទេសមកពីក្រសួងអធិការកិច្ច៖ សូមសហការនិងមេត្តាជួយដុសខាត់ បណ្តុះបណ្តាល បង្ហាត់បង្ហាញ ទាំងទ្រឹស្តី ច្បាប់ និងបច្ចេកទេសពាក់ព័ន្ធនឹងវិស័យអធិការកិច្ច ដោយផ្អែកតាម បទពិសោធន៍និងអនុលោមភាព។ ទី៣.ការផ្សារភ្ជាប់ទ្រឹស្តីទៅនឹងការអនុវត្ត៖ ក្រោយពីបញ្ចប់សិក្ខាសាលានេះទៅ ចំណេះដឹងដែលទទួល បានមិនត្រូវទុកនៅលើក្រដាសឬក្នុងសិក្ខាសាលានេះឡើយ។ សិក្ខាកាមម្នាក់ៗត្រូវដើរតួជាភ្នាក់ងារនៃ ការផ្លាស់ប្តូរនិងកែលម្អ ដោយយកមូលដ្ឋានគ្រឹះទាំងនេះទៅអនុវត្តផ្ទាល់នៅក្នុងអង្គភាពនិងការងារប្រចាំ ថ្ងៃរបស់ខ្លួន ប្រកបដោយស្មារតីទទួលខុសត្រូវខ្ពស់ និងទី៤.ការពង្រឹងក្រមសីលធម៌វិជ្ជាជីវៈ៖ យើងត្រូវធ្វើខ្លួនជាគំរូគេ មុននឹងទៅតម្រង់ទិសអ្នកដទៃ។ ដូច្នេះ សូមដុតរំលាយស្មារតីសីលធម៌និងវិន័យការងារឱ្យបានខ្ពស់បំផុត។

បើតាមលោក ផូ ណារិទ្ធ អធិការ នៃអធិការដ្ឋាន បានឲ្យដឹងថា វិស័យអធិការកិច្ច គឺជាឧបករណ៍គតិយុត្តដ៏សំខាន់ដែលមិនអាចខ្វះបាន ក្នុងការធានានូវអភិបាលកិច្ចល្អ តម្លាភាព និងការគោរពច្បាប់នៅក្នុងរចនាសម្ព័ន្ធរដ្ឋបាលសាធារណៈ។ ការងារអធិការកិច្ច គឺជាយន្តការគន្លឹះក្នុងការតាមដាន ត្រួតពិនិត្យ វាយតម្លៃ និងស្វែងរកចំណុចខ្លាំង ឬ ចំណុចខ្វះខាតលើការអនុវត្តលិខិតបទដ្ឋានគតិយុត្តនិងការបំពេញភារកិច្ចរបស់អង្គភាពរងអធិការកិច្ច ក្នុងគោលបំណងកែលម្អ   ទប់ស្កាត់រាល់ភាពមិនប្រក្រតីនានា និងពង្រឹងអភិបាលកិច្ចល្អ៕ អត្ថបទ រដ្ឋា