មន្ទីរអប់រំរាជធានីភ្នំពេញជូនដំណឹងដល់គ្រឹះស្ថានសិក្សាសាធារណៈ និងឯកជននៅភ្នំពេញឱ្យផ្អាកដំណើរការរយៈពេលពីរថ្ងៃចាប់ពីថ្ងៃទី១៤ និងថ្ងៃទី១៦ ខែវិច្ឆិកា ក្នុងឱកាសកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី លើកទី២០

ភ្នំពេញ៖មន្ទីរអប់រំរាជធានីភ្នំពេញ នៅថ្ងៃទី២៣ ខែតុលា ឆ្នាំ២០២៦នេះ បានជូនដំណឹងឱ្យគ្រឹះស្ថានសិក្សាសាធារណៈ និងឯកជន ក្នុងរាជធានីភ្នំពេញ ផ្អាកដំណើរការរយៈពេលពីរថ្ងៃ ចាប់ពីថ្ងៃទី១៤ និងថ្ងៃទី១៦ ខែវិច្ឆិកា ក្នុងឱកាសកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី លើកទី២០។

នេះបើតាមយោងតាមសេចក្តីជូនដំណឹង ស្តីពី ការផ្អាកដំណើរការគ្រឹះស្ថានសិក្សាសាធារណៈ និងឯកជន ក្នុងរាជធានីភ្នំពេញ ចំនួន ២ថ្ងៃ គឺនៅថ្ងៃទី១៤ និងថ្ងៃទី១៦ ខែវិច្ឆិកា ឆ្នាំ២០២៦ ក្នុងឱកាសដែលកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី លើកទី២០ នៅរាជធានីភ្នំពេញ។

មន្ទីរអប់រំរាជធានីភ្នំពេញបញ្ជាក់ថា៖«ខ្ញុំសូមជម្រាបជូន លោក លោកស្រី នាយក នាយិកា គ្រឹះស្ថានសិក្សា សាធារណៈ និងឯកជន មេត្តាជ្រាបថា៖ ព្រះរាជាណាចក្រកម្ពុជា នឹងធ្វើជាម្ចាស់ផ្ទះរៀបចំសន្និសីទថ្នាក់រដ្ឋមន្ត្រី ហ្វ្រង់កូហ្វូនី លើកទី៤៨ និងកិច្ចប្រជុំកំពូលហ្វ្រង់កូហ្វូនី លើកទី២០ នៅរាជធានីភ្នំពេញ។ ដើម្បីចៀសវាងការ រំខានដោយការកកស្ទះចរាចរណ៍ក្នុងអំឡុងពេលព្រឹត្តិការណ៍ដ៏សំខាន់នេះ ក្រសួងអប់រំ យុវជន និងកីឡា សម្រេចផ្អាកដំណើរការគ្រឹះស្ថានសិក្សាសាធារណៈ និងឯកជន ក្នុងរាជធានីភ្នំពេញ ចំនួន០២ (ពីរ)ថ្ងៃ គឺនៅ ថ្ងៃទី១៤ និងថ្ងៃទី១៦ ខែវិច្ឆិកា ឆ្នាំ២០២៦»។

មន្ទីរអប់រំរាជធានីភ្នំពេញជម្រាបជូនដល់ លោក លោកស្រី នាយក នាយិកា មេត្តាជ្រាប និង សហការផ្សព្វផ្សាយឱ្យបានទូលំទូលាយដល់បុគ្គលិកអប់រំ មាតាបិតា និងអ្នកអាណាព្យាបាលសិស្សគ្រប់រូប ប្រកបដោយស្មារតីទទួលខុសត្រូវខ្ពស់៕