ក្រុមហ៊ុនអាកាសចរណ៍ជាតិ ប្រកាសប្តូរស្លាកសញ្ញាថ្មី ក្រោយមានការបញ្ជាទិញយន្តហោះថ្មីៗ ជាច្រើន​គ្រឿងថែមទៀត

នៅថ្ងៃទី១៥ ខែមករានេះ ក្រុមហ៊ុនអាកាចរណ៍ជាតិ កម្ពុជា ពិធីសម្ពោធស្លាកសញ្ញា និងការ​រចនា​លើ​តួអាកាសយានថ្មី នៅអាកាសយានដ្ឋានអន្តរជាតិតេជោ ហើយនៅក្នុងពិធីនេះ ឯកឧត្តម បណ្ឌិត ម៉ៅហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានឲ្យដឹងថា ក្នុង​ឆ្នាំ​២០២៦នេះ ក្រុមហ៊ុនអាកាសចរណ៍ជាតិ បាន​បញ្ជា​ទិញ​យន្ត​ហោះ​ដឹក​អ្នក​ដំណើរ​ថ្មី​ៗ​ជា​ច្រើន​គ្រឿង​ទៀតពីអាមេរិច និងចិន។

ឯកឧត្តម បណ្ឌិត ម៉ៅ ហាវណ្ណាល់ ក្នុងនាមប្រធានក្រុមប្រឹក្សាភិបាល នៃក្រុម​ហ៊ុន​អាកាស​ចរណ៍​ជាតិ​កម្ពុជា បានថ្លែងថា ការផ្លាស់ប្តូរស្លាកសញ្ញា និងការរចនាលើតួអាកាសយានថ្មីនេះ គឺបាន​បញ្ជាក់​នូវ​តួនាទីកាន់តែសំខាន់ថែមទៀតរបស់ក្រុមហ៊ុនអាកាសចរណ៍ជាតិកម្ពុជា លើការ​បង្ហាញ​អត្ត​សញ្ញាណជាតិខ្មែរទៅកាន់ពិភពលោកទាំងមូល ព្រមទាំងឆ្លុះបញ្ចាំង​នូវ​ភាព​រីក​ចម្រើន​នៃ​វិស័​យ​អាកាស​ចរណ៍ស៊ីវិល វិស័យទេសចរណ៍ ពាណិជ្ជកម្ម និងការដោះដូរវប្បធម៌ និងប្រជាជន តាម​រយៈ​ការ​ដឹកជញ្ជូនតាមផ្លូវអាកាស។

ឯកឧត្តម បញ្ជាក់ថា រចនាលើតួអាកាសយានថ្មីនេះ គឺបានយកអត្តសញ្ញាណសត្វត្រយ៉ងជាស្នូល ដែល​ជា​សត្វស្លាបតំណាងជាតិកម្ពុជា មានលក្ខណៈការពារ រឹងម៉ាំ និងការទទួលខុសត្រូវ។

ឯកឧត្តម បណ្ឌិត ម៉ៅ ហាវណ្ណាល់ បន្តថា ទន្ទឹមនឹងការប្តូរស្លាកសញ្ញា និងការ​រច​នា​លើ​តួ​អាកាស​យាន​ថ្មី​នេះ ​ក្នុងឆ្នាំ២០២៦នេះ ក្រុមហ៊ុនអាកាសចរណ៍ជាតិកម្ពុជា ក៏មានការចុះ​ហត្ថ​លេខា​អនុសារណៈ​នៃ​ការយោគយល់គ្នាដើម្បីទទួលបានអាកាសយានប្រភេទថ្មីៗបន្ថែមទៀត ជាមួយ​ក្រុម​ហ៊ុន​ប៊ូអ៊ីង របស់សហរដ្ឋអាមេរិច និងក្រុមហ៊ុនកូម៉ាក់របស់ប្រទេសចិន ព្រមទាំង​បាន​ពង្រីក​ជើង​ហោះហើរថ្មីៗទៀតជាច្រើនផងដែរ។

ក្នុងឱកាសនេះ ឯកឧត្តម ម៉ៅ ហាវណ្ណាល់ ក៏បានថ្លែងអំណរគុណដល់រដ្ឋាភិបាលភិបាលបារំាង និង​ក្រុមហ៊ុនផលិតអាកាសយានATRបារាំង ដែលបាន​ជួយ​ជ្រោម​ជ្រែង​លក់​អាកាស​យាន​ថ្មី​ទំនើប​ចុង​ក្រោយ​បំផុត ប្រភេទ ATR72-600 ចំនួនបីគ្រឿងឲ្យមកក្រុមហ៊ុនអាកាសចរណ៍ជាតិកម្ពុជា ព្រម​ទាំងបានជួយបណ្តុះបណ្តាលអភិវឌ្ឍន៍ធនធានមនុស្ស​លើ​វិស័យ​អាកាសចរណ៍​ស៊ីវិល​ផង​ដែរ​។

សូមបញ្ជាក់ថា នៅក្នុងឆ្នាំ២០២៥ ការដឹកជញ្ជូនតាមផ្លូវអាកាសនៅកម្ពុជា គឺ​មាន​ក្រុម​ហ៊ុន​អាកាសចរណ៍​ក្នុង​ស្រុក និងក្រុមហ៊ុនអាកាសចរណ៍បរទេសចំនួន៣៦ក្រុមហ៊ុន បាននិង​កំពុង​ប្រតិបត្តិ​ការ​យ៉ាងសកម្ម ដោយបានតភ្ជាប់ជើងហោះហើរកម្ពុជា នៅក្នុងតំបន់ និងទៅ​កាន់​សកល​លោក​ចំនួន​៥២ទីក្រុង ដែលមាន១៨ប្រទេស និងតំបន់រដ្ឋបាលពិសេស ហើយទទួល​បាន​អ្នក​ដំណើរ​តាម​ផ្លូវ​អាកាសចំនួន៧លាននាក់ កើនឡើង១២% ប្រៀបធៀបឆ្នាំ២០២៤៕ អត្ថបទ ស៊ុម សុខជា