ពលរដ្ឋភ្ញៀវទេសចរមកខេត្តកំពតរីករាយប្រើប្រាស់សេវារថយន្តក្រុងជិះឥតគិតថ្លៃ​របស់រាជរដ្ឋាភិបាល

ប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលបានមកលែងស្រុកកំណើត និង​ដើរ​លេង​កម្សាន្ត​នៅ​ខេត្តកំពត បានសម្តែងនូវសេចក្តីពេញចំពោះការយកចិត្តទុកដាក់ របស់រាជរដ្ឋាភិបាល ដែល​បានផ្តល់សេវាជិះរថយន្តក្រុងដោយឥតគិតថ្លៃដល់ពួកគេទាំងមកនិងទៅ ក្នុង​ឱកា​ស​បុណ្យ​ចូល​ឆ្នាំ​ថ្មី​។ ការផ្តល់នេះ ពិតជាបានជួយសម្រួលដល់ការចំណាយ សុវត្ថិភាពការធ្វើដំណើរ ការ​ផ្តល់​ឱកាស​ដល់ពលរដ្ឋបានទៅជួបជុំ និងធ្វើបុណ្យទាន់តាមទំនៀមទម្លាប់ប្រពៃណី ក៏​ដូច​ជា​កាត់​បន្ថយ​ការ​កកស្ទះ និងគ្រោះថ្នាក់ចរាចរណ៍។

ប្រជាពលរដ្ឋមកលេងស្រុកកំណើន ទេចរជាតិ និងអន្តរជាតិ មកដើរកម្សាន្តនៅខេត្តកំពត ក្នុង​ឱកាស​បុណ្យចូលឆ្នាំថ្មីប្រពៃណីជាតិខ្មែរ បានថ្លែងអំណរគុណដល់រាជរដ្ឋាភិបាល ដែល​បាន​គិត​គូរ​ពី​សុខទុក្ខរបស់ពួកគេ តាមរយៈការផ្ត​ល់សេ​វា​រថយន្ត​ក្រុង​ជិះ​ដោយ​ឥត​គិតថ្លៃ​ទាំង​មក​ និង​ទៅ​ដោយ​សុវត្ថិភាព។ ពួកគេថាការធ្វើដំណើរស្រួល កន្លែងកម្សាន្តនៅខេត្តកំពត ក៏រៀបចំបានស្អាត ធានា​ដល់សន្តិសុខ សុវត្ថិភាព និងសណ្តាប់ធ្នាប់ល្អ បង្កើតបាននូវអនុស្សាវរីយ៍ដ៏គួរឲ្យរីករាយ និង​ចង់​ចាំ​បំផុត។

លោក អ៊ាម ច័ន្ទគ្រិះស្នា ក្រុមការងារដឹកជញ្ជូនអ្នកដំណើររបស់សាលារាជធានីភ្នំពេញ បាន​បញ្ជាក់​ថា ​ទិសដៅខេត្តកំពត មានរថយន្តក្រុងជិះដោយឥតគិតថ្លៃរបស់រាជរដ្ឋាភិបាល ចំនួន ៩គ្រឿង រង់​ចាំ​ដឹកបងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ។ ដោយខេត្តកំពត មាន​ទីតាំង​នៅ​ចំណត​រថយន្ត​ខេត្ត និងចំណតភ្នំពេញ នៅផ្លូវ២០០៤ ក្បែរទីបញ្ជាការកងទ័ពអាកាស។ លោក​បាន​បញ្ជាក់​ថា ឆ្នាំនេះប្រជាពលរដ្ឋ និងភ្ញៀវទេសចរ​មក​ទទួល​សេវា​ជិះ​រថយន្ត​ក្រុង​ដោយ​ឥត​គិតថ្លៃ​បា​នច្រើនជាងឆ្នាំមុន៕