អាជ្ញាធរខេត្តបន្ទាយមានជ័យ ជួយជួសជុលផ្ទះពលរដ្ឋ ដែលត្រូវបានបំផ្លាញដោយសារខ្យល់កន្ត្រាក់

បន្ទាយមានជ័យ៖ ឯកឧត្តម អ៊ុ រាត្រី អភិបាលខេត្តបន្ទាយមានជ័យ នៅថ្ងៃទី០៤ ខែឧសភា នេះ បានអញ្ជើញចុះសួរសុខទុក្ខ និងជួយជួសជុលផ្ទះប្រជាពលរដ្ឋ ប្រមាណ៥០ខ្នង ដែលត្រូវបានបំផ្លាញដោយសារខ្យល់កន្ត្រាក់ នៅក្នុងសង្កាត់ម្កាក់ ក្រុងសិរីសោភ័ណ នាល្ងាចថ្ងៃទី០៣ ខែឧសភា ឆ្នាំ២០២៦ និងបានបំផ្លាញផ្ទះប្រមាណជាង៥០ខ្នង។

ឯកឧត្តម អ៊ុ រាត្រី បានបន្តជំរុញណែនាំឱ្យប្រជាពលរដ្ឋត្រូវបង្កើនការប្រុងប្រយ័ត្នចំពោះបាតុភូតធម្មជាតិដែលតែងតែកើតមានឡើង ដូចជាខ្យល់កន្ត្រាក់ រន្ទះបាញ់ ជាដើម ដែលបណ្តាលឱ្យប៉ះពាល់ដល់ទ្រព្យសម្បត្តិ ផ្ទះសំបែង និងអាយុជីវិតរបស់ប្រជាពលរដ្ឋផងដែរ។

ឯកឧត្តម បានអំពាវនាវឱ្យប្រជាពលរដ្ឋ ក៏ដូចជាអាជ្ញាធរមូលដ្ឋាន ត្រូវដាំកូនឈើឱ្យបានច្រើនទៅតាមលទ្ធភាពអាចធ្វើទៅ បានដើម្បីជួយទប់ទល់ខ្យល់កន្ត្រាក់នេះ។ ក្នុងនាមប្រធានក្រុមការងារចុះមូលដ្ឋានក្រុងសិរីសោភ័ណ ឯកឧត្តម អ៊ុ រាត្រី បានជួយជាស័ង្កសីសម្រាប់ជួសជុលផ្ទះប្រជាពលរដ្ឋ ចំនួនជាង៧០០សន្លឹកផងដែរ៕