យុវជនយល់ថា លំហសិទ្ធិសេរីភាពជំនឿសាសនា ជាការផ្ដល់ភាពកក់ក្ដៅជូនពលរដ្ឋ និង​អ្នក​វិនិយោគ

ក្រុមយុវជន បានលើកឡើងថា លំហទូលំទូលាយនៃសិទ្ធិសេរីភាព លើការគោរព​ខាង​ជំនឿ​សាសនា និងប្រពៃណី របស់ពលរដ្ឋកម្ពុជា គឺជាភស្ដុតាងបញ្ជាក់ ពីដំណើរលទ្ធិប្រជាធិបតេយ្យ និង​ការគោរពសិទ្ធិមនុស្ស ហើយការបើកលំហសេរីភាពនេះ ក៏ជាការផ្ដល់ភាពកក់ក្ដៅជូនពលរដ្ឋ និង​អ្នកវិនិយោគដែរ។

យុវជន នៃសាកលវិទ្យាល័យភូមិន្ទនីតិសាស្រ្ដ និងវិទ្យាសាស្រ្ដសេដ្ឋកិច្ច ចំនួន៣នាក់ បានប្រាប់ BTV នៅថ្ងៃទី១៦ ខែកុម្ភៈនេះថា រាជរដ្ឋាភិបាល បានបើកលំហយ៉ាងទូលាយ ចំពោះ​សិទ្ធិ​សេរី​ភាព​របស់​​ប្រជាពលរដ្ឋ។ ជាក់ស្ដែងពលរដ្ឋ មានសិទ្ធិសេរីភាពពេញលេញ ក្នុងការគោរពប្រតិបត្តិជំនឿ សាសនា និងប្រពៃណី ដែលពួកគេជឿជាក់ ដោយគ្មានការឃាត់នោះឡើយ។ ជាក់​ស្ដែង​នៅ​ក្នុង​ឱកាស​ពិធីបុណ្យចូលឆ្នាំថ្មីប្រពៃណី ចិន និងវៀតណាមនេះ ពលរដ្ឋដែលជាប់សែស្រឡាយចិន-វៀតណាម បានប្រារព្ធពិធីបុណ្យចូលឆ្នាំថ្មីរបស់ពួកគេ នៅកម្ពុជា យ៉ាងរីករាយ។

គួរ​ជម្រាបជូនថា ពិធីបុណ្យចូលឆ្នាំថ្មីប្រពៃណី ចិន និងវៀតណាម នៅឆ្នាំ២០២៦នេះ មាន​រយៈ​ពេល​ ៤ថ្ងៃ គឺចាប់ពីថ្ងៃទី១៦ ដល់ថ្ងៃទី១៩ ខែកុម្ភៈ។ ប្រជាពលរដ្ឋខ្មែរ ដែលជាប់ សែ​ស្រឡាយ​ចិន​ និងវៀតណាម បានប្រារព្ធពិធីបុណ្យចូលឆ្នាំថ្មីប្រពៃណីជាតិរបស់ពួកគេ យ៉ាងរីករាយ ដើម្បី​ទទួល​នូវ​លាភសំណាង និងពរជ័យមកក្នុងក្រុមគ្រួសាររបស់ពួកគេ៕ អត្ថបទ៖ លៀ ស៊ីណា