មួយឆ្នាំ២០២៥ មានអ្នកជំងឺមកពិគ្រោះជំងឺក្រៅនៅមន្ទីរពេទ្យមិត្តភាពខ្មែរ-សូវៀត​មាន​ជិត ១០ម៉ឺនករណី

ក្នុង​ឆ្នាំ២០២៥កន្លងមកនេះ មានអ្នកជំងឺដែលមកពិគ្រោះ ជំងឺក្រៅនៅមន្ទីរពេទ្យមិត្តភាពខ្មែរ-សូវៀត មានចំនួន៧៩៥,៣០៣ករណី កើនឡើង៣១% និងសម្រាកព្យាបាលមានចំនួន ៩០,៧៤៦នាក់ ដែលមានការកើនឡើងជាង ១៥% បើធៀប នឹងឆ្នាំ២០២៤កន្លងមកនេះ។ នេះ​បើ​តាមឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ សូវៀត នៃ​ក្រសួង​សុខាភិបាលថ្លែងប្រាប់ BTV នៅថ្ងៃទី១៦ ខែកុម្ភៈ ឆ្នាំ២០២៦នេះ។

ឯកឧត្តម​សាស្រ្តាចារ្យ បានឱ្យដឹងថា ជាទូទៅក្នុងមួយថ្ងៃ មានអ្នក​ជំងឺ​មក​ពិគ្រោះ​ជំងឺ​ក្រៅ​ចន្លោះ​ពី​២.០០០នាក់ ទៅ៣.០០០នាក់ ចំណែកអ្នកជំងឺសម្រាកក្នុងមនី្ទរពេទ្យ មាន​ចំនួន​ចន្លោះ​ពី​១.០០០​នាក់ ទៅ២.០០០នាក់។ ចំនួនដែលកើនឡើងនេះ គឺជាការសម្តែង​អំពី​ការ​ជឿ​ទុក​ចិត្ត​ពី​បង​ប្អូន​ប្រជាពលរដ្ឋ និងការជឿទុកចិត្តកាន់តែខ្លាំង មកលើមនី្ទរពេទ្យមិត្តភាពខ្មែរ-សូវៀត យើង។

ជា​ចុង​ក្រោយឯកឧត្តមសាស្រ្តាចារ្យ ងី ម៉េង បានថ្លែង​អំណរ​គុណ​ដ៏​ជ្រាល​ជ្រៅ​បំផុត​ចំពោះ​ឯកឧត្តម​សាស្ត្រា​ចារ្យ ឈាង រ៉ា រដ្ឋមន្ត្រីក្រសួងសុខាភិបាល ដែលតែងតែចង្អុលបង្ហាញ ណែនាំ និង​ជួយបណ្តុះបណ្តាល ភាពជាអ្នកដឹកនាំដល់ថ្នាក់ដឹកនាំយើងទាំងអស់គ្នា ព្រមទាំង​បាន​ជួយ​ជ្រោម​ជ្រែង​ជានិច្ចកាល ទើបធ្វើឲ្យមន្ទីរពេទ្យមិត្តភាពខ្មែរ-សូវៀតមានការរីកចំរើន និងអាចជួយ​ដល់​ប្រជា​ពលរដ្ឋយើងឲ្យទទួលបានការផ្តល់សេវាថែទាំ និងព្យាបាលប្រកបដោយគុណភាព សមធម៌ និងប្រសិទ្ធភាពខ្ពស់៕ អត្ថបទ រដ្ឋា